Kaassuartakkanik issiavillit peqatigiiffittaartinniarneqarput
Kaassuartakkanik issiavinnik atuisut immikkut peqatigiiffittaarnissaat taassuma anguniarpaa. Poul Erik Christensen Nuummi ilaquttaminut tikeraarnini iluatsillugu Kulturikkut Illorsuarmi, Katuami, piumasunut ualeq manna katersortitsiniarpoq. Ilaasortanngorusussinnaasut tikilluaqquvai, pilersaarutinilu saqqummiutissavai.
Panni Rita USA-mi sisorartilluni ajutoormalli, qitini napillugu innarluuteqalermat, innarluutillit pillugit inatsisip oqartussaasunit eqquutinneqarnerunissaa, kaassuartakkanillu issiavillit ajornannginnerusumik pisortat illuutaannut isersinnaanngornissaat Poul Erik Christensenip sorsuutigilerpaa. Ombudsmandi akuliutsinneqareersorlu, Ineqarnermut, Attaveqaqatigiinnermut Angallannermullu Pisortaqarfik kommuninut erseqqissaavoq innarluutillit atugaasa nakkutigilluarneqarnissaat pisussaaffigigaat.
Kaassuartakkanik issiavinnik atuisut peqatigiiffiliuunneqarnissaasa saniatigut utoqqaat pitsorluttut, tappiitsut isigiarsuttullu Katuamut aamma tikilluaqquneqartut, Poul Erik Christensen Radioaviisimut oqarpoq. - Innarluutillit peqatigiiffeqartut nalunngikkaluarpara, erseqqissaavoq. Kaassuartakkanik issiavillit peqatigiiffittaarnissaat tassa maanna misilinnialerpaa, inatsisissamullu Inatsisartullu upernaaru ataatsimiilerpata inatsisissamut siunnersuutip saqqummiunneqarnissaa ilimagineqarpoq.
