Kaassuartakkanik ingerlatillit utaqqisortaqanngillat

Sisimiuni ilinniartut ineqarfissaannik 30-nik sanaartornermi, qamutit kaassuartakkat aqqutissaannik sananeq aammalu matuisa silinnermik sananeqarnissaat pissutigalugu inissianik sanaartorneq millioninik arlalinnik akisunerulissaaq. Inissiamulli tulluarsakkamut utaqqisoqanngilaq.

Ilinniartunik qamutinik kaassuartakkanik atuisunik, inissianut isertertoqarnissaanik maannakkorpiaq utaqqisoqanngilaq.

2,5 million koruunit. Sisimiuni ilinniartut inissaannik 30-nik sanaartornermi tassa akileraartartut akiligassaat. Qamutinik kaassuarlutik atuisut aammalu pitsorluttut iseriaannaanissaat eqqarsaatigalugit sanaartornerit aallartissimapput.

Taakku eqqarsaatigalugit sanaartortoqaraluartoq, taamaattoq ilinniartunik qamutinik kaassuartakkanik atuisunik, inissianut isertertoqarnissaanik utaqqisoqanngilaq.

Taamaattoq qujanarpoq, isaarissat qamutinik kaassuartakkanut aqqutigiuminarsillugit sanaartortoqarmat, taama isumaqarpoq Poul Erik Christensen, Sisimiuni qarmaasoq:

- Innarluutillit namminneq ineqartarput aammalu inunnik allanik takusarnissaat eqqarsaatigineqartariaqarpoq. Ilinniaqatiminnut pulaarsinnaasariaqarput, aamma innarluutillit inaat allanit ajornanngitsumik iserfigineqarsinnaasariaqarlutik, oqarpoq.

Ilinniartut inissaat 30-t sananeqalerneranni, innarluutillit eqqarsaatigineqarsimannginnerat aammalu inissianik sanaartornermi malittarisassat malinneqannginneri Poul Erik Christensenip uparuagaa, ombudsmandip isumaqataaneratigut sanaartugassat 3 million koruunik akisunerulerput.

Aningaasarpassuit taakku sipaarneqarsinnaasimagaluartut qarmaasoq isumaqarpoq.

- Majuartarfiimmi sananeqareersimapput taakkulu akilerneqareerlutik. Tassalu taakku allanngorlugit sananeqarneri immikkut akilerneqartussanngorput. Aallaqqaataaniilli innarluutilinnut aqqutaasinnaanngorlugit sananeqarsimasuuppata aammalu sanaartornermi inatsisit malinneqarsimasuuppata, aningaasat millionit affaat sipaarneqarsinnaasimagaluarput.

Jneqarnermut Pisortaqarfiup januaarip aallaqqaataa 2007 aallarnerfigalugu piumasaraa, kommunit sisamaasut inissianik sanaartornermi inatsisit atuuttut unioqqutittassanngikkaat.

Pitsanngorsaanerit pissutigalugit, kalaallit innarluuteqartut Danmarkimi najugaqartut, Kalaallit Nunaannut uterusulerneranik kinguneqarsinnaasoq, Poul Erik Christensen isumaqarpoq:

- Kalaallit Nunaanni ilinnialersinnaapput, kikkunnut tamanut pulaartarsinnaapput, minnerunngitsumillu Kalaallit Nunaanni suliffittaarsinnaalissapput, Poul Erik Christensen naggasiivoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat