Kaasari qaqutigoortumik oqalugiarpoq
Atomip nukinganik nukissiorfinni ajutoornernut ernummateqarnini Kaasarip Akihitop oqaatigaa, Japanimiullu neriuuteqarunnaaqqunagit kajumissaarlugit.
Kaasarip 77-inik ukiullip taassuma, Japanimiunit utoqqaanerusunit ataqqineqaqisup, ajunaarnersuaq siornatigut nalaanneqarsimanngisaannartutut annertussuseqarnerarlugu taavaa.
Atomip nukinganik nukissiorfiup Fukushimap ajutoorfiunera imaluunniit atomip nukinganik nukissiuuteqarneq, Kaasarip oqalugiarnermini oqaaseqarfiginngilaa.
Taamaattorli allagaatini Wikileaksimeersuni ullumi oqaatigineqarpoq, Japanimiut atomip nukinganik nukissiornerminni isumannaallisaanerat pisoqalisimasoq, Atomimik nukissiorneq pillugu nunat tamalaat nakkutilliisuutitaasa 2008-mili uparuarsimagaat.
Nunap sakkortuumik sajunneratigut nukissiorfiit ajornartorsiulersinnaanerat Japanimut taamanili mianersoqqussutigineqarsimavoq.
Tamanna tuluit aviisianni The Telegraphimi allaaserineqarpoq.
Allagaatini Wikileaksimeersuni oqaatigineqarpoq, Japanimi naalakkersuisut atomip nukinganik nukissiorfiup nunap kippasissuaneersumik matusinissaq taamani itigartissimagaat, naak nunap sakkortuumik sajunneratigut ajutoorsinnaanissaa ernumanartoqaraluartoq.
Nukissiorfiup taassuma nunap sajunneranut uuttuut 6,5-imik sakkortussusilik sapissanngikkaa taamani naliliisoqarsimavoq. Nunap sajunnera tallimanngormat 9,0-imik sakkortussuseqartutut uuttorneqarpoq.
