Kaalund: Parnaarussiviliornissaq aningaasarsiuuttariaqarpoq

Kalaallit Nunaanni sukkanerpaamik matoqqasumik isertitsiviliortariaqarpoq aappagumullu danskit aningaasaqarnermut inatsisaanni tamanna aningaasassaqartinniarlugu maannangaaq sulissutigineqartariaqartoq, Socialdemokratit folketingip eqqartuussiveqarneq pillugu ataatsimiititaliaanni nunallu avannarliit siunnersuisooqatigiiffiata innuttaasunut atuisoqarnermullu ataatsimiititaliaanni ilaasortaatitaasoq Per Kaalund isumaqarpoq.

Nunat avannarliit ataatsimiititaliaanni ilaasortat qanittukkut nunatsinneqqammerput.

- Kalaallit Nunaanni eqqartuussiveqarneq aaqqissuuteqqinniarneqarpoq Namminersornerlu pillugu isumalioqatigiisitanilu ilaasortat ulluni makkunani aamma suliniuteqaraluartut matoqqasumik isertitsivik sukkanerpaamik sananeqartariaqarpoq Per Kaalund taama oqarpoq.

Taanna aperaarput tamanna nammineq qanoriliuuseqarfiginiaraa imalu akivoq:

- Folketingimi eqqartuussiveqarneq pillugu ataatsimiititaliami ilaasortaagama siunnersuusiorlunga oqaluuserisassanngortitsisinnaavunga. Aggustimi ataatsimiititaliami ilaasortat Kalaallit Nunaannukartussaapput ilimagilluinnarparalu taamanikkornissaanut siunnersuutigisara eqqartorneqartussaassasoq. Kalaallillu Nunaanni matoqqasumik isertitsiveqalernissaa maannagaaq suliniutigalugu ataatsimiititaliami ilaasortaqartinnut inatsisinillu atortitsinermut ministerimut eqqaareerpara, Socialdemokratit Folketingip eqqartuussiveqarneq pillugu ataatsimiititaliaani ilaasortaatitaat Per Kaalund oqarpoq.