Kaajallaasitaq nutaaq Naalakkersuisunut kisimi iluaqusiivoq
Immikkut siunnersortimik atorfinitsitsisoqarsinnaanissaa pillugu kajallaasitaq Inuit Ataqatigiit sinnerlugit Inatsisartuni ilaasortap Sara Olsvigip apeqquserpaa.
Naalakkersuisut tamarmik immikkut siunnersortimik ataatsimik atorfinitsitsisinnaalerput, Naalakkersuisulli siulittaasuat immikkut siunnersortinik arlalinnik atorfinitsitsisinnaatitaalerluni.
Kajallaasitaq naapertorlugu immikkut siunnersortit Naalakkersuisut partiimi sulinermut atatillugu ikiuuffigisinnaavaat, partiimilu sulinermut atatillugu allat saniatigut partiit Naalakkersuisuutitaqartut siunnersortaattut taamaalillutik atorneqarsinnaanngorlutik. Inuit Ataqatigiillu periarfissaq taanna apeqquserpaat:
- Ingerlatseriaatsimi partiit ataatsiakkaat naalakkersuinikkut siunnersuinermut atugassanik ikittunik aningaasassaqarfigisanni tamanna partiimik Naalakkersuisuutitaqartunik annertumik iluaqusiisumik equngalersitsivoq. Pingaartumik eqqarsaatigissagaanni tamanut ammasumik atorfimmik inuttassarsiuilluni allagarsiussissarnikkut ministerimtu allattunik tusagassiisarnermilu ataqatigiissaarisumik atorfinitsitsisoqarsinnaammat suliassat assingisa ilarpassuinik isumaginnissinnaasumik, partiimut siunnersortitut atuunneq minillugu, Sara Olsvig ilaatigut allappoq.
Immikkut siunnersorteqarneq tusagassiuutit Naalakkersuisullu akornanni ungasinnerulersitsisartoq, taamalu aamma innuttaasut nunallu naalakkersuisuisa akornanni, Inuit Ataqatigiit oqaatigaat, tamallu oqartussaaqataaneranni tamanna ajornartorsiutinngorsinnaasoq oqaatigalugu.