Københavns Universitet Issittumi suliarpassuaqarpoq
Universitetip aallartitai misissuivimmut qanittukkut tikeraarput. Misissuiviup tamakkiissumik atorluarneqarneratigut Issittup ilisimatusarfigineqarnerata nukittorsaqqinneqarnisaa tikeraarnermi siunertarineqarpoq. Aallartitat ilagaat Københavns Universitetip pisortaa Ralf Hemmingsen, siulersuisut siulittaasuat Nils Strandberg aamma pinngortitamik uumasunillu ilisimatusarfimmi pisortaq John Renner Hansen.
- Ilisimatuut piffissap taama sivisutigisup ingerlanerani maani aaqqissuussaasumik paasissutissanik katersisinnaasimanerat immikkut illuinnartuuvoq, taamaaliornikkummi silap pissusaata allanngoriartornera aamma naasut uumasullu allanngoriartornerat malinnaaffigineqarsinnaasimavoq, pinngortitamik uumasunillu ilisimatusarfimmi pisortaq John Renner Hansen taama oqarpoq.
Misissuivik ukiut tamaasa tikeraartorpassuaqartarpoq. Siorna tikeraartut 200-t missaanniipput, nunanillu tamalaaneersunik peqataaffigineqartumik suliniutit 21-t misissuivimmi ingerlanneqarsimallutik. Sammineqartut assigiinngitsorpassuupput, ilaatigut issittup imaata uuliamik nungutsikkiartortitsisinnaaneranik misissuineq qipoqqaallu neriniartarnerat.
- Angakkussarfimmi (Arktisk Station) suliarineqartut nukittorneqarnissaat kissaatigaarput, init inississimaffillu immikkuullarissoq suli pitsaanerusumik atorluarneqalersillugu. Issittumut tunngatillugu ilinniartitaanikkut sammisanik nutaanik kiisalu nunanik tamalaanik suleqateqarnerup annertusarnissaanut iluaqutaassaaq, pisortaq Ralf Hemmingsen oqarpoq.
