Københavnimit Nuummut angalasut coronamut misissortinnissamut aggersarneqartalissasut
Københavnimit Nuummut timmisartumik angalasussat, Kastrupimi nassatanik tunniussinermi, Nuummi coronamik misissortinissamut piffissamik ullumimiit tunineqartalissapput.
Tamanna Namminersorlutik Oqartussat, Peqqinnissaqarfik Air Greenlandillu suleqatigiinnerisigut periarfissaalersoq Naalakkersuisut tusagassiuutinut nalunaaruteqarlutik taama allapput.
KNR-imit siusinnerusukkut oqaluttuarineqarpoq, Kommuneqarfik Sermersuumi misissortittarfissamik Nuummi illoqarfiup qeqqqani kalaaliaratoqqami ammaasoqalersoq.
Naalakkersuisut nunatsinnut tikittut tikinnerminnit ullut tallimat qaangiunneranni misissorteqqittarnissaannut malittarisassat atuutilerseqqinnikuuaat.
Angerlarsimaannarninni pisuttuarsinnaavutit aamma najugaqatigisannut qanillisinnaavutit.
Niuerniarsinnaavutit.
Allanut pulaassanngilatit, pulaartoqassanngilatit, bussissanngilatit, taxassanngilatit suliartussanallu.
Nunatsinnut tikinnermi ullut tallimat qaangiunneranni misissorteqqissaatit. Misissortinnerup tunillatsissimannginneq uppernarsarpagu suliartoqqissinnaavutit nalinginnaasumillu inuunerit ingerlateqqissinnaallugu.
Misissorteqqinnianngikkuit ulluni 14-ini angerlarsimaannassaatit aatsaallu ersiuteqanngikkuit suliartoqqillutit.
Angalasut nappaammik ersiuteqanngitsut tamarmik 13 oktober aallarnerfigalugu misissortittarfimmi nutaami misissortittalernissaat naatsorsuutigineqarpoq.
Tassani nakorsaaneq Henrik L. Hansen oqaluttuarpoq Kalaaliarakoq Kommuneqarfik Sermersuumit pigineqartoq misissuivissatut naleqquttuusoq.
AAMMA ATUARUK Kalaaliaratoqqami misissuiffik: Nuummi nammineq kajumissutsiminnik suliaqartut coronamut misissuissasut
- Inuit ersiuteqanngitsut eqqartorpagut, ilumoorporlu taakku tunillatsissimannginnissaat qulakkiivissinnaanngilarput. Kisianni ilimanassusaa annertunngilaq. Taamaammat inuit taakku allanut tamanut akuliutinnginnissaat pillugu malittarisassanik pisariaqartunik aamma suliaqartoqassaaq, nakorsaaneq oqarpoq.
Misissortittarfik piffissani inniminnerneqarsimasuni taamaallaat ammasassaaq.
Utaqqisunik tulleriiaartunik pilersitsinnginnissaq anguniarneqarpoq, taamatullu tunillaassuunnerup siaruarnissaanut aarlerinaatit sapinngisamik annikinnerpaaniitinnissaat qulakkeerniarneqarput.
. Angalasut inuillu COVID-19-imik ersiutillit Dronning Ingridip Napparsimavissuani ) misissortittarnerat ingerlaannassoq, Naalakkersuisut tusagassiuutinut nalunaaruteqarlutik taama allappoq
