Avatangiisit

Ilulissat kangiata sermia iigarujussuartoq

Ilulissat kangiani sermip annertuupilussuarmik iigarnera amerikamiut aviisiata Washington Postip allaaseraa. Sermeq 12,4 kvadratkilometerinik angissuseqartussatut naatsorsorneqarsimasoq aviisip allaaseraa.
Assi © : U.S. Geological Survey
Allattoq Karsten Sommer
aggustip 25-at 2015 07:36
Nutserisoq Simon Uldum -

Iluliarsuit imaanut iigartarneri pillugit tamakkiisumik uuttortaasoqarsimanngilaq, aviisili Washington Post naapertorlugu Nunatsinni sermit iigartartut iigarnerisa annersarigunarigaa arlalinnit oqaatigineqarsimavoq.

Sermip iigarnera internettimi oqallittarfimmi Arctic Sea Ice Forumimi allaaserinnittartumit Ilulissat kangiata qaammataasakkut assilineqarneranik misissuinerani paasineqaqqaarpoq. Allaaserinnittartoq aamma sermip 12,4 kvadratkilometeriniunissaanik naliliisuuvoq.

 

90-ikkunnut naleqqiullugu pingasoriaammik sukkassuseqarluni ingerlaartoq

Ilulissat kangiata sermia iigartartoq Nunatsinni sermit iigartartut sukkanersaattut ilisimaneqarpoq. Amerikami misissuisoqarfik NASA Earth Observatory naapertorlugu sermeq iigartartoq 2012-ip ingerlanerani 17 kilometerinik ingerlaarsimavoq.

1990-ikkunni sermip iigartartup ingerlaarnerata sukkassusianit tamanna pingasoriaammik sukkaneruvoq.

Taamaammat NASA Earth Observatory naapertorlugu sermip iigartup angissusia pisortatigoortumik eqqoqqissaartumillu uuttortarneqarsinnaanngikkallarpoq.

Sermeq Kujallermi sermeq iigaartoqarfik nunarsuarmi katagartitsinerpaat ilagaat sukkanerpaartaralugulu.

  • Ukiuni qulini kingullerni sermip sukkassutsi marloriaatinngorsimavaa, ullumikkut ulloq-unnuarlu 40 meterit missaannik sukkassuseqarluni. 
  • Ukiuni kingulliunerusuni sermip killinga tunuarujussuarsimavoq. Ullumikkut sermip killingata 40-nit 90 meterinut portussusillup annerpaartaa nunap qaavaniippoq. 
  • Ukiumut sermeq 46 kubikkilometerit missaannik katatsisarpoq. Sermip annertoqataa aatsikkaanni USA-p tamarmiusup ukiumoortumik imermik atugaqarnera tamaat matussuserneqarsinnaavoq. 
  • Nunatsinni iluliani tamani sermeq 10 procentinik pilersuisuuvoq. 
  • Sermermit iigartartumit ilulissat anginerpaat kaanngartut 1.5 kubikkilometerit sinnerlugit angissuseqarput. Assigaat arsaattarfiit 30-t, Mount Everestitut portutigisumik sermimik qallersimaneqartut. Iluliat taama ittoq ataaseq Danmarkimi innuttaasut imermik pilersugarisinnaavaat ukiuni arfineq-marlungajanni! 
  • Immap qulaani takussaasoq iluliaq 1/10-itut aamma 1/7-itut angissusiliuvoq. Apeqqutaasarpoq iluliaq qanoq silaannartalinnik pullartaqassuseqarneranik qanorlu sioqqanik ujaraaqqanillu imaqartiginersoq. Najoqqutarisaq: Kangia.gl
Suli pitsaanerulernissatsinnut ikiortigut! Nutaarsiassamut malugisaqaruit uunga allaffigitigut.

Aamma atuaruk