Jørgen Wæver Johansen, Siumut, Inatsisartunut ilaasortaanerminit tunuarpoq
- Qaammatini 18-ini suliffeqarfinnut aningaasaliisarfimmi Greenland Venture-mi sulininni suliassaqarnerulersimaqaagut. Suliffeqarfiit soqutigisaqarfigisavut 14-init ullumikkut 35-nut amerleriarsimapput, ukiorlu naatinnagu 40-nngornissaat naatsorsuutigaarput. Tamatuma kinguneranik Inatsisartuni sulinissannut piffissaq annikippallaalerpoq. Aammattaaq pingasunik nukappiaraateqaratta, ilaquttakka piffissaqarfiginerorusuppakka, Jørgen Wæver Johansen Radioaviisimut oqarpoq.
Jørgen Wæver Johansen 1999-imi februaarip 16-annili Inatsisartuni ilaasortaavoq.
- Ukiorpassuarni naalakkersuinermut tunngasuni suleqataavunga, taamaattumillu ilunngullunga tunuarpunga, pisoqarfiusumiinnissarami nuannarisarigakku. Taamaattorli inuunermi pingaarnersiuisariaqalerneq pisariaqalersinnaavoq, taamaaliorpungalumi, Jørgen Wæver Johansen oqarpoq.
Jørgen Wæver Johansenip tunuarneratigut Otto Jeremiassen Inatsisartuni ilaasortanngorpoq.