Jørgen Lindegaard: Kalaallit suliffiutaat kattussuuttariaqarput
Suliffeqarfissuaq nuna tamalaani suliffeqarfiusoq ISS-itut ittoq Kalaallit Nunaanni immikkoortortaqalissappat unammillerniassallugu ilaatigut ajornakusoorsinnaassaaq, suliffeqarfik aningaasaateqarluarsinnaammat. Taamaammat pingaaruteqarpoq suliffeqarfiit minnerit Kalaallit Nunaanniittut katersuuffeqalersinnaanissaat, taamaaliornikkut nukittunerulersinnaaniassammata Jørgen Lindegaard oqarpoq, ilanngullugu oqaatigalugu:
- Suliffeqarfiit taakku suliffeqarfissuarmik suleqateqalersinnaassapput, assersuutigalugu pilersuinermik ingerlataqarlutik. Suliffeqarfissuaq Kalaallit Nunaanni pissutsinik ilisimasakissinnaammat suliffeqarfiit Kalaallit Nunaanniittut suleqatiserineqarnissaat pingaaruteqarpoq, ISS-ip pisortaanera Jørgen Lindegaard oqarpoq.
Jørgen Lindegaard inuutissarsiortut Katuami ataatsimeersuarmata oqalugiartunut ilaavoq, kisermaassilluni niuernermiit unammilleqatigiinnermut ikaarsaarnermi suut mianerisassaanersut taassuma sammivai siunnersuusiorlunilu. Aningaasat ISS-ip 2007-imi kaaviaartitai 63 milliardit koruuniupput nunanilu 50-ini immikkoortortaqarluni. Sulisut katillugit 470.000-iupput.