Jyllandspostenimut saassussiniat Al-Qaetamit aqunneqarput

Pakistanimi pinerliinianik aqutsisutut CIA-mit naatsorsuutigineqartoq tassaavoq Ilyas Kashmiri, taanna pinerliiniat pisortaasa akornanni ulorianarnerpaatut isigineqarpoq, qallunaallu toqorarneqarnissaannik kissaateqartuusimagunarluni, taamatut allaaserisaqarpoq nutaarsiassaqartitsivik Ritzau.

Ilyas Kashimiri aviisimi Asia Timesimi apersorneqarluni oqarpoq, nunat killiit USA-lu Sataniusut piuneerussaasariaqartullu.

- Ilyas Kashimiri pinerliianiani al-Qaedami ilaasortat qanganisaanerit ilaattut naatsorsuutigineqarpoq, taamatut oqarpoq, Pakistan pillugu ilisimasalik tusagassiortoq Puk Damsgaard, Pakistanimi illoqarfiit pingaarnersaanni Islamabadimi suliffeqartoq.

Pinerliiatut pasineqarlutik tigusarineqartut marluk tassaapput 49-nik ukiulik David Coleman Headley aammalu 48-nik ukiulik Tahawwur Hussain Rana.

Angutit taakkua marluk aviisip Jyllandspostenip allaffeqarfiisa saassunneqarnissaannik imaluunniit aviisimi kulturi pillugu aaqqissuisup Flemming Rosep, titartaasartulluunniit Kurt Westergaardip pinerliiffigalugit saassunneqarnissaannik pilersaaruteqarnertik, Mickey Mousemik taaguuteqartippaat.

Angutit taakku marluk tigusarineqartut, sivisuumik annertuumillu suliassaqarfiusumik eqqartuunneqarnissartik naatsorsuutigisariaqassavaat, aammalu inuunertik naallugu parnaarussaasinaallutik.