Ritzau Avatangiisit

Juunip qaammataa nunarsuaq tamakkerlugu aatsaat taama kiatsigisoq

Sila kissatsikkiartuinnarpoq. Maajip qaammataa nunarsuaq tamakkerlugu aatsaat taama kiatsigisoq, kisitsisit nutaat takutippaat.

Allattoq Inge S. Rasmussen

juunip 17-at 2016 05:05

Nutserisoq Simon Uldum -

Qaammatini kingullerni 13-ini qaammatit tamaasa silap siornatigut kiannerpaaffigisarsimani qaangertuarpaa, maannalu nunarsuaq tamakkerlugu aatsaat taama kiatsigivoq.

Nunarsuatsinni ukiut 136-t matuma siorna silap kiassusia ilisimatuunit silasiortunillu uuttoortarneqartalermalli maajip qaammataa aatsaat taama kiatsigivoq.

Paasissutissat silasiorluni ilisimatusarfimmit National Oceanic and Atmospheric Administrationimeersut, Noaamik naalisarneqartumit, tamanna takutippaat.

Aamma atuaruk Juunip qaammataani aatsaat taama kiatsigivoq

Noaa nunarsuarmi silap kiassusianik 1880-imili uuttortaasalerpoq.

2016-ip silap kiassusianik uuttortaasoqartalermalli aatsaat taama kiatsigilersinnaanera, amerikamiup silap pissusianik ilisimatusartup nuimasup ukiup matuma aallartinnerani siulittuutigaa.
Silallu siornatigut kiannerpaaffigisimasaa qanittuaraavoq, tassaalluni siorna 2015-imi.

Ilisimatuut naapertorlugit silap nunarsuaq tamakkerlugu kianneruneranut nassuiaatissaq tassaavoq inuup pilersitaanik nunarsuup kissatsikkiartornerata aamma Manerassuarmi kiattup sarfarsuata El Niñop sakkortuup ataatsikkoorlutik nalliussimaarnerat. El Niño ukiuni kingullerni sakkortuupilussuuvoq silalu pisarnerminit kianneroreersoq kiannerulersiiinnarlugu.

Manerassuarmi kiattup sarfarsuata El Niñop sakkortuup sakkukilliartornera ilutigalugu nunarsuaq tamakkerlugu silap kissatsisimaarnera sakkukillissaaq. Taamaattoqarneralu La Niñamit taarserneqassaaq, tassalu ukiariartornera nillernerulissalluni.

/ritzau/