VIDEO Juullisiutinik nuuteeraliaq soqutigineqarluartoq
Operartartut Ida Heinrichip Josef Lund Josefsenillu juullisiutinik nuuteeraliaat "Nuannareqaara" 3.000-inngorlugu naqiterneqartoq oktobarip 13-iani saqqummerpoq.
- Idalu CD-liornissarput eqqartortuarsimavarput. Sinerissami tusarnaartitsigaangatta, tusarnaartitsereernerup kingorna inuit apersortartorujussuugamik nuuteeqqamik saqqummersitsinikuunersugut, Josef Lund Josefsen oqarpoq.
Siorna juullimi angalareeratta aalajangerpugut; tassa massakkut piffissanngorpoq immiussinissatsinnut. Piffissarlut tulluussorigatsigu juullimut saqqummersitsissalluta, aasaq juullisiutinik immiussivugut.
Operartartut juullisiutinik saqqummersitaat tunisaallualereersimavoq
- Tupaallannartumik sukkasoorujussuarmik pilerigineqartorujussuulluni ingerlarsorpoq. Tallimanngormat Københavnimit tikiupparput ingerlaannarlu Brugsenimut Elgigantenimullu pajugutigalugu.
-Ullut marluk ingerlaneriinnaani Brugseni pingasoriarluta pajupparput nalunaaqqilluni karsimik ataatsimik pajoqqeqqulluni, Ida Heinrich taama oqaluttuarpoq.
