Juullip inuata allakkerivia matunngujoorpoq

Nuuk Tourism taamalu Juullip Inuata allakkerivia matuneqartussanngorunarpoq.
Allattoq Elisa Isaksen
oktobarip 25-at 2011 06:16

Tassani maanna pisortaasup Jon Krogip, allaffeqarfimmik taassuminnga qaammatini kingullerni pingasuni ingerlatsisuusup suliassaq suliffeqarfiup eqqartuussissuserisuanut isumagisassanngortippaa, taassumalu takornariartitsinermut allaffeqarfik ingerlaannarsinnaanersoq nalilersussavaa, taamaattorli Jon Krogip Nuuk tv-mut oqaatigaa, Nuuk Tourismip ingerlaannarsinnaanissaa ilimaginngikkini.

Aningaaserivia imaqanngilaq, suliffeqarfillu millionit koruunit affaanik akiitsoqarluni. Suliffeqarfimmik piserusuttunik soqutiginnittoqanngilaq, Nuuk Tourismillu pisortarisimasaa aningaasanik peqquserlussimasutut politiinut unnerluutigineqarluni.

Suliffeqarfik matuneqassappat tamatuma peqatigisaanik Juullip Inuata Allakkerivia, Nunatta Juullip Inuata Nunaatut ilisimaneqalerneranik ukiorpassuarni nittarsaassisuusoq  aamma atorunnaassaaq.

Nuuk Tourismip aningaasarliornini pissutigalugu, meeqqat nunarsuatsinni sumi tamaaneersut, Juullip Inuanut allagaat siornali akissuteqarfiginngitsoorpai, ajoraluartumillu ukiormanna aamma akissuteqarfigineqarsinnaassanngitsut, pisortap Jon Krogip Nuuk TV-mut oqaatigaa.

Taamaattorli allakkat Europamit Juullip Inuanut nassiussat Danmarkimi tiguneqartarnissaannik Danmarkimillu akineqartarnissaannik, Post Danmark isumaqatigiissuteqarfigineqarsimavoq.

Nuuk TV-mit oqaatigineqarpoq, Kommuneqarfik Sermersuumit qanoq iliuuseqartoqarsinnaanera nalilersorneqalersoq, tamannali iluatsissanngippat, Nuuk Tourism tassungalu atasoq Cafe Santa matusariaqalissapput.