Juullip inua tuniniarneqalerpoq

Taamaattumik kommuni ukiumi nutaami pilersaaruteqarpoq juullip inuata ilisarnaatai suliffeqarfinnit inunnillu ataasiakkaanit  tuniniarneqarsinnaanerinik suliariumannittussarsiuunneqarnissaa.

Juullip inuata tuniniarneqarneranut suliniutinik arlalinnik suliaqartoqarsimavoq uniinnarsimasunik, aningaasat sulisussallu amigaatigineqarmata, Qaasuitsup Kommuniani takornariaqarnermut ataatsimiititaliami siulittaasoq Palle Jeremiassen oqarpoq.

Qaasuitsup Kommuniata takornariaqarnermut ataatsimiititaliaani arlaleriarlugu oqaluuserineqarpoq, juullip inua tuniniarneqassoq allatulluunniit pineqassanersoq pisisinnaasunilli soqutiginnittoqarsimanngilaq.

Juullip inuata ilisarnaatai sumiikkaluaraanniluunniit tuniniarneqarsinnaasunngorlugit suliariumannittussarsiuunneqassaaq.

- Julemandi nammineq akuersissummik pillutik tuniniarsinnaalissavaat taamaasillutillu aningaasarsiornikkut  iluaqutigisinnaalissallugu, nunattalu avammut iluaqutigisinnaagaa naatsorsuutigivarput, Palle Jeremiassen oqarpoq.

Juullip inuata ilisarnaataanik tuniniaanissamut inatsisinut sinaakkutit  kommunimi inatsilerituunit suliarineqarput taakkualu naammasseriarpata suliariumannittussarsiuussineq avammut suaarutigineqarumaartoq, Palle Jeremiassen oqarpoq.

- Juullip inuata ilisarnaatai assigiinngitsunik tuniniarneqarsinnaapput, soorlu juullilernerani pisiniarfinni tuniniarlugu, juullip inuata illoqarfianik soorlu Finlandimi annertoorujussuarmik atorneqartoq, akuersissummik taamatut ittumik pinikkut sanasoqarsinnaavoq, Palle Jeremiassen oqarpoq.

- Juullip inua aningaasarsiorfinngortinneqassaaq, suliffiutillit  imaluunniit inuit ataasikkaat qanoq ilusilersorniarnerlu namminneq aalajangissavaat, Palle Jeremiassen oqarpoq.

Juullip inuata tuniniarneqarnissaanut soqutiginnittunik saaffiginnittoqartarpoq

- Juullip inuata ilisarnaataanik tuniniaaneq nammineq illoqarfigisamut nunaqarfimminnulluunniit nuunneqarsinnaanersoq saaffiginnittoqartarpoq, juullip inuata ilisarnaataanik suliaqarnikkut  takornariaqarnikkut allatigullu iluanaarutiginiarlugu saaffiginnittartunik, Palle Jeremiassen oqarpoq.

Juullip inuata tuniniarneqarnissaanut suliariumannittussarsiuussineq ammaanneqarpat sumiikkaluartulluunniit qinnuteqarsinnaapput.