Juullimut nuisitsineq Odensemi ileqquulersimavoq

Ukioq manna aamma nuisitsisoqassaaq, tamanna arfininngornermi novembarip ulluisa 28-anni ullup qeqqata kingorna nalunaaqutaq ataatsimiit ualikkut sisamat tungaannut pissalluni.

Aaqqatit isersimmatillu puisip amiinit sanaat, saanernit tuugaanillu pinnersaasiat puisillu amii ilivitsut Kalaallit Illuutaanni pisiniarfiup pisiarisimavai. Tamakku saniasigut tunissutissaarniarfeqassaaq, aggiasullu kusanartulianik, assassukkanik allanillu kalaalerpaluttunik pisisinnaassapput.

Kalaallit Peqatigiiffiat Umiaq gløggimik æbleskivinillu tuniniaassaaq, juullisiutinillu erinarsorlutillu tussiassapput. Projekt Inuk tiimik kaffimillu aamma tuniniaassaaq - aningaasat isertitat Kalaallit Nunaanni ilaqutariinnut meerartalinnut piitsunut juullimut tunissutisiassaannut atorneqarumaarlutik.

Kalaallit Illuutaanni Odensimiittumi juullimut nuisitsisoqartarnera 2000-imili pisalerpoq.