Juullimut inuulluaqqusinissami billetit nunguttut
DR-ip nunatsinnut juullimut inuulluaqqusinissaanut billetit isissutissat tuniniarneqarnerat ima ingerlalluaqaaq. Imalu ingerlalluartigaaq ullumi ataasinngorneq decemberip arfernat DR nalunaarluni isissutissat nungukkallartut. Isissutissalli tuniniakkat aqagumiit ilaneqassasut, aallakaatitami ataqatigiissaarisoq Sidsel Klostergaard ilisimatitsivoq.
Isissutissat ilaneqarsinnaanerannut pissutaanerarpaat DRip tusarnaartitsisarfissuani inersuarmi immikkoortukkaarlugit tuniniaaneq ingerlanneqartarmat tv-migooq assi pitsaanerpaaq anguniarlugu. Maannalu tassa DR-imi tusarnaartitsisarfissuup immikkoortui allat ilanngunnialerpaat.
Juullimut inuulluaqqusisoqartarnerani aatsaat aappassaa DRip tusarnaartitsisarfissuanit aallakaatitsineq ingerlanneqassaaq.
Siorna isissutissat tuniniarneqartut ilaneqarnissaat pisariaqartinneqarsimanngilaq taamanikkullu billetit 900-ngajaat tunineqarput. Taamaattumik aatsaat taama isiginnaariaqartigisumik juullimut inuulluaqqusineq ingerlanneqartussanngorpoq.
Juullimut inuulluaqqusineq decemberip 22-iani aallakaatinneqassaaq.
