Juullimut akissarsiat suli assortuussutaajuarsinnarput
Isumaqatigiissut malillugu ukioq manna kingullermik juulli sioqqullugu aningaasarsisoqassaaq, aappaagumiillu decembarip naanerani aatsaat aningaasarsisoqartalissasoq, Maliina Abelsenimit nalunaarutigineqarluni.
Maliina Abelsen pissaanerup mamassusaanik nuannarinnilersimanersoq kattuffissuit sisamat, Atorfillit Kattuffiat, PIP, IMAK aamma SIK-p ataatsimoorullugu allakkaminni aperipput, kattuffissuimmi maluginiarsimavaat, isumaqatigiinneq Maliina Abelsenip nammineq kisimiilluni ataqqinaatissaralugu saqqummiukkaa.
Kattuffissuit sisamaasut uparuarpaat, isumaqatigiinniarnermi kingullermi isumaqatigiissutaammat ileqquliussaasut pigiliunneqarsimasut naliginnaasumik isumaqatigiinniarnissani atorunnaarsinneqartarmata atuutsinneqartarlutillu, tullianilu isumaqatigiinniarnerup tungaanut tamakku atuutsinneqartarlutik, tassalu kattuffissuit tamanna aallaqqaammulli oqaatigiuartarsimagaat allallutik.
Kattuffiit tamarmik 2012-imi isumaqatigiinniartussaammata juullimut akissarsisannginnissaq Namminersorlutik Oqartussanit atorunnaarsinneqarsinnaalerpoq.
- Taama nalunaaruteqarneq ima paasineqassanngilaq, tassa juulli sioqqullugu akissarsisarnissaq taamaatinneqartoq, Atorfillit Kattuffiata siulittaasua, Erik Hammeken KNR-imut oqarpoq.
- Kialluunniit maanna oqaatigisinnaanngilaa, juulli sioqqullugu akissarsisarneq isumaqatigiinniarnermi tullermi ilanngunneqassanersoq, tassami isumaqatigiinniarneq tulleq aatsaat aappaagu 2012-mi pissammat, Erik Hammeken oqarpoq.
Ukioq manna juulli sioqqullugu akissarsiat tunniunneqartarnerat tassa kingullerpaajussasoq tassa ilimanarunnaarallarpoq. Tamanna aappaagu isumaqatigiinniarnermi tullermi paasinarsissaaq.
