Juulliliinnaqaaq

Lars Frederik Andersen, Christian Rex-ilu KNR-ip tv-studioani nikorfapput nipaakujullutik. Soorlumi studio maqaasissagaat, tassami immiussillutik naammasseqqammerput.

Lars Andersen aamma Christian Rex ulluinnarni Deluxus Studiomi sulisarput. Taakkuuppullu NunaFondip isiginnaagassiornissamut unammisitsinerani maajimi ajugaasut.

Deluxus Studio aggustilli aallaqqaataani isiginnaagassiat immiullugit aallartippaat. Massakkullu isiginnaagassiat 24-t killorlugillu suliareqqinnialerpaat.

- Isiginnaartussat naatsorsuutigissavaat juullimi ammartagaq nuannersuussasoq nutaaliaallunilu, Lars Andersen oqarpoq.

Taassuma oqaatigaa immiussinerit ingerlalluarsimasut.

- Juullimi ammartagaq ilaqutariinnut allanullu soqutiginnittunut juullerpalaartitsissaaq, Christian Rex qungujulluni oqarpoq.

Immiussinerit amerlanerit KNR-p studiaani immiunneqarsimapput, Maria Motzfeldt pingaarnertut inuttaralugu.

Isiginnaagassiani immikkoortut tamarmik 15 minutsit missaani sivisussuseqassapput, KNR TV-kkullu decemberimi aallakaatinneqassallutik.