Juullikkunngooq aneerfissaqqissapput

Nunatsinni juulli silap ukiormanna naakkivaa. Aput maanna tuttussaq ataannassasoq, DMI-mit nalunaarput.

Maanna qularutissaajunnaannguatsiarpoq aputilimmi Nunatsinni juullisiornissarput. Taannaannaanngilarli, silagooq aamma sisoqqaffissaqqinniarpoq.

DMIp silamut ilimasaarutaa malillugu sapaatip akunnerata naanerani nittaallunilu anorlersinnaavoq. Kisianni anori qatsulertussaaq taamalu juullip qanillinerani silaannakkut angallattut silamik akornutissaqassagunaratik.

- Ulloq unnuarlu tulliuttoq Kitaani apingaatsiassaaq. Aamma ilimanarpoq issi atuutiinnassasoq taamaammat aput nakkaasoq ataannassaaq aamma juullip qaangernera ilanngullugu, DMI-mi pigaartut pisortaat Steen Rasmussen KNR-imut oqarpoq.

Ilaasorpassuit illoqarfinnut assigiinngitsunut angallatileruttorput allallu nunanut kujasinnerusunut juullisioriakaallutik. Soorluuna sila taakkununnga uumisaarilersaanngitsoq.

- Sila atoruminassagunarpoq. Nittaallertarsinnaavoq kisianni sakkortuumik anorersuarnissaanik maanna ilimanartoqanngilaq, Steen Rasmussen oqarpoq, sulili mianersorfigalugu juullip qanillivinnerani silap qanoq innissaata nalunaarutiginissaa.

Juullimili sulinngiffimmi atuanngiffimmilu aputip nuannisarfiginissaanut periarfissagissaarpoq. Siornamut sanilliullugu allaaneroqaaq taamanikkut sisorarnermut atortut toqqorallarlugit sialussiutit atugaanerummata.

- Kælkit sisoraatillu saqqummerneqarsinnaakutsoorput. Silaannaq kissartoq Kalaallit Nunaat kujaqquterujussuarlugu ingerlaarpoq. Taamaammat ilimanarluinnarpoq juulli Kalaallit Nunaanni aputeqarumaartoq, Steen Rasmussen qujasaavoq.

Silap qanoq innissaa DMIp nittartagaani www.dmi.gl-imi malittarineqarsinnaavoq aamma silassap KNR-ikkut atuarneqartarnerani.

Isummersuutit

inatsisartut-sal-sep2019.jpg

Inatsisartut Ukiakkut Ataatsimiinnerat



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat