Juulliaqqami toqutsineq Nunatta Eqqartuussiviani suliareqqinneqarpoq
Nalunaaqutaq 14.00 nutartigaq
Unneerluussisut uppernarsaatinik ullaap tungaani saqqummiipput.
- Timmiarsiut toqutsinermut atorneqartoq, assit uppernarsaatillu assigiinngitsut toqutsiffimminngaanneersut unnerluussisunit saqqummiunneqarput, KNR-imi tusagassiortoq Jaaku Lyberth eqqartuussivimminngaanniit taama paasissutissiivoq.
Angut 42-nik ukiulik 34-nik ukiulimmik toqumik kingunilimmik persuttaasimasutut ukioq ataaseq affarlu pinerluuteqarsimasunut inissiisarfimmiittussanngorlugu Nuup Eqqartuussiviani qaammatip siuliani eqqartuunneqarpoq, angullu 37-nik ukiulik pinngitsuutinneqarluni.
Angutip 42-nik ukiullip pineqaatissiissut Nunatta eqqartuussivianut ingerlateqqippaa, taamatuttaaq angutip 37-nik ukiullip pinngitsuutitaanera unnerluussisunit Nunatta eqqartuussivianut ingerlateqqinneqarluni.
Suliat marluk Nunatta Eqqartuussiviani ataatsikkut ullumi suliarineqarput, angutit taakkua marluk nunatta eqqartuussiviani nassuiaateqassapput. Ullup qeqqa siorna angut 42-inik ukiulik unnerluussisumit killisiorneqarpoq, nassuiaateqarlunilu. Eqqartuussineq ualeq naallugu ingerlanneqarnissaa naatsorsuutigineqarpoq.
Ullumikkut eqqartuussinermi angut 42-nik ukiulik eqqissisimasumik pissuseqarpoq, 37-nillu ukiulik attortissimasutut aliasuttutullu pissuseqarluni.
Eqqartuussinerup ullumi naammassineqarnissaa naatsorsuutigineqarpoq, pineqaatissiinnerlu sapaatip akunnerata tulliani aalajangiiffigineqarnissaa illersersuisunit naatsorsuutigineqarluni.