Juulli palasissaaleqiffioratarsinnaavoq

Decembarip 24-iani naalagiartitsinerit pingasut juullerujussuarmilu naalagiartitsinerit pingasut ingerlanneqartussaapput. Tassaappullu Nuummi palasituaasup Marianne Platou Olsenip juullikkunni suliassarpassuisa ilaminiinnanngui. Juullikkunili biskoppimit ikiorneqassaaq.

Nuuk, siornatigut arlalinnik palaseqarsimasoq, maanna ilungersunartumik inissisimavoq. Tamannalu ilagiit sinniisaata ernumanartoqartippaat.

- Nuup 16.900-nik innuttaqartup juullikkunni ataasiinnarmik palaseqarnissaa ilumoorsinnaanngilaq, ilagiit sinniisaanni siulittaasoq Niels Olsen KNR.gl-imut oqarpoq.

Palasip aappaa ernisimalluni sulinngiffeqarpoq, palasilu danskiusoq decembarip aallaqqaataanit sulinngiffeqarnissaminik akuerineqarsimalluni. Nuummi palasit marlunnik sinneqarsimagaluarput. Sivisuumilli napparsimasoqarnera pissutigalugu domprovst Isak Davidsen Sisimiuni palasiusariaqalersimavoq.

Taamaammat palasip Marianne Platou Olsenip ajoqillu Kaj Peter Heinrichip marluinnaallutik suliassarpassuit isumagisariaqassavaat. Biskoppili Sofie Petersen juulliaqqami juullerujussuarmilu naalagiartitsissaaq.

Aammali napparsimmavimmi utoqqaat illuinilu naalagiartitsisoqartussaavoq, taakkulu aamma palasip ajoqillu isumagisussaavaat.

- Juullikkunni qanoq iliussanerluta oqaloqatigiissutigaarput, Marianne Platou Olsen oqarpoq.

Biskoppip Sofie Petersenip taamatut inissisimasoqarnera tusagassiorfinnut oqaaseqarfigiumanngilaa.

Ilagiit sinniisaanni siulittaasup Niels Olsenip ilageeqarnermut naalakkersuisumut Mimi Karlsenimut allagaqarluni Nuummi naalagiartitsinissanut sulisussanik qulakkeerisoqarnissaa piumasaqaatigaa.