Juulli palasinut ulapaarfiuvoq

Nuummi Oqaluffiit juullimi ulikkaavittartut, naak sapaatini naliginnaasunik aamma naalagiaqartaraluaqisoq.

- Oqaluffiit ulikkaavillugit naalagiaraangamik, juullip evangiliuanik ukiumut ataasiaannarlugu tusartakkatsinnik inuit pingaartorsiutiginnillutik tusarusuttarput, taavalu tussiaqattaartut aamma tusarnaartorneqartarlutik. Palasiulluni nuannertaqaaq, inuit taama amerlatigalutik aggertarmata, Marianne Platou Olsen oqarpoq.

Nunatsinni ilaqutarippassuit eqqissillutik ilorrisimaarlutillu juullisiorranneranni, palasit ulapittaqaat. Taamaammat Marianne Platou Olsen juullimi nerisassanik piareersaanissamut piffissaqarneq ajorpoq.

- Juullip tungaanut piareersagasinnaasut piareersartarpakka. Kisianni juullimi nerisassanut uiga ulapittuusarpoq, tassalu uanga juullimi igavallaarneq ajorpunga. aallaqqaammut nakkutigipassiinariarlugit, sinneri uima nakkutigisarpai, palasi oqaluttuarpoq.

Kisianni ulapikkaluaqaluni aamma angerlarluni ilaquttani ilagalugit juullisiornissamut aamma piffissaqartarpoq.

- Juullisiussaanga nuannaarlunga. Naalagiartitsereerlunga angerlaruma juullisioqatigiikkumaarpugut nereqatigiilluta allatulli, MArianne Platou Olsen naggasivoq.

Aqagu juulliaqqami ualikkut nalunaaqutaq tallimanut naalagiarneq KNR radiukkut toqqaannartumik aallakaatinneqassaaq.