Juulli eqqissinartoq

Air Greenlandip juullisioriat anngunniarlugit ullumikkut arlalinnik timmisartuussereerluni, timmisartuni, timmisartunut inilianut ualimut eqqussuussinnaanngorpai. Juullisioriarlutimmi angalasut tamarmik ornitaminnut apuutereersimalerput.

Tamatuma peqatigisaanik nassiussanik allakkanillu timmisartukkut assartuussisoqarlualaavippoq, juullimilu poortugarsiassat kingulliit apuutereersimassajunnarsipput.

Angallannermut pilersaarutit naapertorlugit timmisartuussisoqartussaanngikkaluartoq, ullumikkut juulliaqqami Upernavik, Ilulissat, Sisimiut, Maniitsoq aamma Nuuk timmisartuussivigineqarput.

Air Greenland ataasinngorpat killilimmik Nunatsinniinnaq timmisartuussissaaq, angalanissamullu pilersaarutit naapertorlugit marlunngorpamiit timmisartuusseqqilissalluni.

Inuit eqqissinartumik juullisiornerarlugit sinerissami politeeqarfiit nalunaarput.

- Inuit eqqissillutik juullisiorput, neriuppugullu juulli tamaat eqqissinartumik atorumaaraat, sinerissami politiit ilaat taama oqarpoq.