Justus Hansen: Efterskoli sooq Maniitsumi?

Taanna isumaqarpoq Inatsisartut amerlanerussuteqartut upernaaq ataatsimiinnermi efterskolipTasiilamiinnissaa isumaqatigiissutigigaluaraat.

- Tunumi efterskoleqalerpat kitaamiut Tunumi pissutsinut immikkuullarissunut paasinninnerulernerannik kinguneqassaaq, taamaalillunilu ataqatigiinnerulernermik misigisimalersitsilluni Justus Hansen oqarpoq.

Ataavartumik allamik efterskoliliornissamut Naalakkersuisut pilersaarummik saqqummiussissasut, Inatsisartut upernaaq tamarmiullutik isumaqatigiissutigaat, Justus Hansenip erseqqissaatigaa.

- Taamaattumik tupaallannarpoq eqqumiillunilu paasillugu Naalakkersuisut efterskolissaq Maniitsumut inissinniarmassuk, Justus Hansen oqarpoq.

Inuiaqatigiinni oqallinnermi Tunup puigorneqannginnissaa Justus Hansenip sorsuutigisaanut ilaavoq.

- Ajoraluartumilli allaanngilaq Naalakkersuisut matumani Inatsisartut kissaataat tusarnaarpallaarsimanngikkaat. Uangalu paasisinnaavara, efterskolip ataavartup Maniitsumiinnissaa Naalakkersuisut pilersaarutigigaat. Soqutiginassaaq tusassallugu sooq, aammalu illoqarfiit qassit, inissiivigineqarnissaminnut kissaateqarsimanersut, Justus Hansen oqarpoq.