Naalagaaffiit Peqatigiit: Justin Trudeau nunap inoqqaavinut utoqqatserpoq
Naggueqatiigit Inuit, indianerit metisillu nunasiaateqarnerup nalaani kanngunarsagaallutillu, atornerlunneqarlutillu sumiginnagaasimasut, sulilu taama misigisimasut, Justin Trudeaup Naalagaaffiit Peqatigiit oqaluttarfiannit ilaatigut oqaatigaa.
Nunammi inoqqaavisa nunaliussaasa ilaanni imermik eqqiluitsumik suli pilersuisoqanngitsorluunniit Trudeap oqaatigaa.
Nunap inoqqaavisa meeraasa atuarfinni nerisaqarfiullutillu ineqarfiusuni misigisarsimasaasa kingunerlutsitsisimanerat Trudeap ilaatigut eqqartorpai.
Imminut toquttarnerup nunap inoqqaavisa inuusuttaasa akornanni suli ajornartorsiutaanera Trudeap tikkuarpaa, soorlu aamma inuusuttut najugaqarfitsik qimallugu ilaatigut ungasissumukarlutik ilinniariartarnerat suli aamma ajornartorsiutaasinnaasoq.
Canada ungasissorsuanngitsukkut aatsaat naalagaaffinngormat nunasiaateqarsimanerup nalaani ajornartorsiutit imaaliallaannarlugit aaqqiivigineqarsinnaanngikkallartut Trudeap erseqqissaatigaa, saammaasseqatigiinnissarli pillugu suliaq aallartinneqareersoq, Canadallu Naalagaaffiit Peqatigiit nunap inoqqaavi pillugit aalajangersagaannik akuersisimasoq.
Naak Justin Trudeaup oqalugiaataa uissuumminartortaqaraluartoq aamma isornartorsiorneqarpoq, USA-mmi præsidentia Donald Trump Korea Avannarlerlu taaneqanngimmataluunniit.
