Julie erinarsoqatigiinnik aqutsisuussaaq
Erinarsoqatigiit assigiinngitsut sisamat "AllStars"-imi unammisinneqassapput, ajugaasullu 250.000-it koruuninik akissarsitinneqassallutik. Aningaasat taakku siunertamut pitsaasumut atorneqassapput.
Isiginnaartartut SMS atorlugu taasisinneqartassapput, erinarsoqatigiit kikkut/sorliit aallakaatitassiamiit aallakaatitassiamut ingerlaqqittassanersut taasissutigineqartassammat.
Kalaallit Nunaannut attuumassuteqartut kikkulluunniit Juliap erinarsoqatigiivinut peqataarusunnertik qinnutigisinnaavaat.
Kalaallit Nunaanni inunngorsimasuusariaqarnanilu peroriartorsimanissaq piumasaqaataanngilaq.
Erinarsoqatigiinnut piukkoortut Kalaallit Nunaanni Københavnimilu februaarimi misilitsissasut, TV2 nalunaarpoq.
Erinarsoqatigiit Københavnimi sungiusartassapput. Erinarsoqatigiinnut peqataarusuttut Danmarkimeersut inissaqarnissartik, nerisaqarnissartik angalanissartillu namminneq isumagissavaat.
Kalaallit Nunaanni najugaqaraanni inissaqarneq nerisaqarnerlu "AllStars"-ip isumagissavaa.
Qaammatilli pingajuata qeqqa Danmarkimiittariaqarnissaq sillimaffigineqassaaq, marsimiit maajip tungaanut.
18-iliisimanissaq matumani pingaaruteqarpoq, 18-iliisimanngikkaanilu angajoqqaatut akisussaatitaasumik peqarnissaq pingaaruteqarluni.
Erinarsortartut marluk Rasmus Nøhr aamma Marc Johnson kiisalu rappertartoq Niarn Julie Berthelsenip unammissavai.
Julie Berthelsenilu "AllStars"-imi ajugaassagaluaruni 250.000-it koruunit peqatigiiffimmut Nanu Børnimut tunniutissamaarpai. TV2-p nittartagaani taama allaaserinnnittoqarpoq.