Julie AllStarsikkut erinarsugaq tusaamasaq ingerlaqqissutigaat
TV2-p erinarsoqatigiinnut unammisitsinerani aatsaavissuaq kalaallisut erinarsuummik tuluttut qallunaatulluunniit akuugaanngitsumik erinarsortoqarpoq, atorneqarmat Siiva Fleischeriup atugaa 'Silarsuaq Takuiuk', Mads Lumholtimit erinarsorneqartoq.
Mads Lumholtip kalaallisut oqaatsit ulluinnarni atugarinngikkaluarlugit kalaallisut pikkunavissumik erinarsorpoq, Nina Kreutzmann Jørgensenillu tullinnguukkami qallunaatut Barndommens Gade erinarsorpaa.
Nuuk sinnerlugu erinarsoqatigiit tallimanngorpat ajugaaniutivinnissanut anngunniunnissamut taamaalillutik anngutiinnaqaat.
Kikkut ajugaanissaanik eqqoriaasitsisartut Julie erinarsortuilu AllStarsimi ajugaassasut ilimagilluinnaraat, aviisi Ekstra Bladet ullumi saqqummersoq allaaserinnippoq.
Nittartagaq atorlugu aningaasanoorluni eqqoriaasitsisarfik Bet365 nalunaarpoq, maannamut eqqoriaasitsinermi Julie ajugaasussatut ilimagineqangaarami ajugaappat aningaasanoorutit, 1,60-eriaatai pinnatassaasut. Niarnip erinarsoqatigiivinik taasisut 2,30-riaataanik pinnassapput, ajugaasussatullu ilimagineqannginnerpaat Johnsonikkut eqqoriarlugit aningaasat akiliutit - taakku ajugaagaluarpata 14-eriaatai pinnatassaassagaluarput.
SMS-inilli taasinerit ullumi naammassimmata, Johnsonikkut anipput. Sinneruppullu Juliep aamma Niarnip erinarsortartui.
Siorna AllStars-eqarnerani ajugaasup Flemming Bamse Jørgensenip aamma Julie ajugaassangatippaa.
- Qularinngilara AllStarsimi peqataasunit tamanit Julie ilisimaneqarnerpaasoq aamma nalunngilara tusaamasanut allanut naleqqiullugu isiginnaassallugu tusarnaassallugulu nuannarineqarpaasoq, Flemming Bamse Jørgensen aviisimut oqarpoq.
