Julie AllStars tallimanngorpat ingerlaqqissapput
Erinarsoqatigiit tv-kkut isiginnaartartunit pitsaanerpaat pingasut akornanniittutut toqqarneqarput, taamalillunilu Juliap erinarsoqatigiinni siuttuni marluusut suli erinarsortoralugit tallimanngorpat ingerlaqqissinnaalerluni.
Rasmus Nøhrip erinarsoqatigiivi Nørrebromeersut ikinnerpaanik toqqagaaqqikkamik, erinarsoqatigiit, erinarsornermik unammisitsinermi peqataajunnaarput.
Juliap erinarsoqatigiinni siuttui marluusut tamarmik asanninnermut tunngasunik erinarsorput: Nina Kreutzmann Jørgensenip erinarsorpaa Sara Barcilles-ip erinarsugaa "Lovesong", Mads Lumholtillu erinarsorlugu Gavin Degraw-ip erinarsugaa "In love with a girl".
Julie Berthelsenip erinarsoqatigiivisa saniatigut, rapperlutik erinarsortartut Johnsonip Århusimeersup erinarsoqatigiivi aamma Niarn-ip Aalborgimeersup erinarsoqatigiivi aamma ingerlaqqipput.