Juliane Henningsenip ministeriuneq apeqquteqarfiginiarpaa

Meeqqat 1951-imi immikkut toqqarneqarlutik misiliutigineqartut, kiisalu Kalaallit Nunaanni ilaqutaasut, misiliut pillugu nassuiaasoqarnissaanik naalagaaffimmiillu utoqqatsertoqarnissaanik piumasaqaataat, maanna tusaaneqarpoq.
Allattoq Elisa Isaksen
aggustip 07-at 2009 12:17

Folketingimut ilaasortaq Juliane Henningsen Radioaviisimi misiliut pillugu sammisaqareersugullu, Danmarkimi naalakkersuisut qanoq iliuuseqassanersut apeqquteqarfigilerpai.

- Misiliummut attuumassuteqartut utoqqatserfigineqarnissaminnik piumasaqarnerat pissusissamisoorpoq, Juliane Henningsen oqarpoq.

- Isumaqarpunga una apeqqut inuiaqatigiinnut tamanut attuumassuteqartoq, minnerunngitsunik inunnut taakkununga pineqartunut ilaqutaasunullu. Taamaattumik utoqqatserfigineqarnissamik kissaataat aamma inuunerminni nunasiaataanermi pisimasut ilaasa kingumut qiviarnerini isumaqarpunga pissusissamisoortoq, nunarsuarmi pisimasut allat aamma eqqarsaatigalugit utoqqatserfigineqarnissamik aamma nassuiaanneqarnissamik piumasaqarnerat pissusissamisoorpoq.

Kalaallit Nunaat sinnerlugu Folketingimut ilaasortaq Juliane Henningsen misiliut pillugu Danmarkimi Naalakkersuisut siulittaasuannut Lars Løkke Rasmussenimut paragraf 20-ikkut apeqquteqalerpoq, Naalagaaffimmit misiliut pilugu qanoq iliuuseqassanersut paasiniassallugu, soorlu naalagaaffimmit nassuiaasoqassanersoq kiisalu utoqqatsertoqassanersoq apeqqutigalugit.

- Tassa maannakkorpiaq Danmarkimi naalakkersuisut siulittaasuannut apeqquteqaatissamik piareersaalluta mannakkorpiaq suliaqarpugut. Tassa nammineq naliliinera qanoq ittuunersoq paaserusunnarmat aamma inuiaqatigiinnut aamma inunnut pineqartunut utoqqatsernissamut nassuiaanissamullu piumassuseqarnersoq paasiniassagatsigu.

Helene Thiesen maanna Danmarkimi najugaqartoq misiliummut 1951-imi toqqagaavoq, taassuma utoqqatserfigineqarnissani kissaatigaa, sulili taama pisoqanngilaq. Sisimiuni meeqqat misiliutigineqartut ilaasa qatanngutaat Kiistaaraq Enoksen misiliineq pillugu nassuiaanneqanngisaannarput. Misiliut ukiut 60-it matuma siornagut pisoq suli nassuiaatigineqarnissaa taakkunannga pisariaqartinneqarpoq. Naalagaaffimmiillu utoqqatsertoqarnissaa aamma kissaatigineqarpoq. Juliane Henningsenip pineqartut apeqquteqaateqarnissaminut atatillugu naapikkusuppai.

- Isumaqarpunga suliap aallartinnissaanut apeqqutit ukua aallarniutigisinnaagivut. Aamma inuit pineqartut qanimut tikillugit oqaloqatiginissaat uannut pingaaruteqarpoq. Inuiaqatigiinni paaseqatigiinnissarput aamma pisariaqartipparput aamma nunasiaataanerup nalaani iliuuserineqarsimasut suli tarnikkut inuiaqatigiittut atugarisatta eqqartorluarneqarnissaat aamma pingaaruteqarpoq, tamannami suliamut pinngitsoorani ilaasariaqarmat, Juliane Henningsen naggasiivoq.

Aamma atuaruk