Juliane Henningsen urani pillugu isumasioqatigiissitsisoqarnissaanik noqqaavoq
Juliane Henningsen isumaqarpoq saffiugassanut qinngornernik ulorianartunik akulinnut akuersaanngilluinnarnerup atorunnaarsinneqarnissaa pillugu immikkoortoq Inatsisartuni qaqinneqaqqaarmat pitsaasumik oqallittoqanngitsoortoq.
- Urani pillugu oqallinneq attueqqusinngilluinnarnerup atorunnaarsinneqarnissaanut tunngasumik Inatsisartuni oqallittoqaraluarmat sammisaq eqqartorneqanngilaq, eqqartorneqarput periutsit, peqataasitsineq, urani pillugu ilisimasanik siammarterineq, paasisat pillugit apersorsinnaaneq piunngilaq, Juliane Henningsen allappoq.
Politikeri illuatungiliuttuninngaanneersoq toqqissisimannginnerarlunilu ernumanerarpoq, aammalu aalajangeeqataanissaminut ilisimasani naammanngerujussuartut paasissutissallu pissarsiariuminaannerarlugit. Oqallisigineqarnerunissaa apeqqutillu akineqanngitsut akineqarnissaat kissaatigaa.
- Sooruna urani taama tuaviuunniarneqartigisoq, uffalu immikkoortunut allanut tunngatillugu pitsaasumik suliaqarnissarput anguniarlugu upernaakkut ataatsimiinnissami suliarineqarnissaannut ajornaquteqanngitsumik innersuussinnaallutigit, Juliane Henningsen aperivoq.
Aamma aalajangiisoqartinnagu sooq Naalakkersuisut danskillu naalakkersuisuisa isumaqatigiinngissutaat aaqqeqqaarneqarniannginnersut apeqqutigaa.
Aamma Inatsisartuni politikerit danskit politikeriinut naleqqiullugit paasissutissanut tunngatillugu ilisimakinnerunerarpai. Folketingip illersornissamut ataatsimiititaliaata, Kalaallit Nunaanni pissutsit pillugit ataatsimiititaliaata kiisalu nunanut allanut ataatsimiititaliaata urani pillugu nalunaarusiamut kingullermut tunngatillugu teknikkikkut ilisimasassanik nassuiaaffigineqarsimapput. Inatsisartuttaaq teknikkikkut ilisimasassanik nassuiaaffigineqarnissaat Juliane Henningsenip kissaatigaa.
Naalakkersuisut partiit tamarmik peqataaffigisaannik urani pillugu isumasioqatigiissitsinissaat piumasaraa. Henningsen allappoq, Naalakkersuisut siulii Maniitsumi aluminiumik suliniummut, uuliasiornermut kiisalu suliniutit angisuut pillugit inatsimmut tunngatillugu taamaaliorsimasut.
