Juliane Henningsen: Namminiilivinnissamik eqqarsaat nutaajunngilaq

Videokkut apersuineq tuluttut oqaasertalik, Naalakkersuisut nittartagaanni nassaarineqarsinnaavoq - tusagassiortunullu nunanit allaneersunut takusassianngorlugu immiussaalluni. Aleqa Hammondip oqaatigisaa kingulleq Juliane Henningsenimit illuatungiliuttuneersumit maanna isornartorsiorneqarpoq.

- Aleqa Hammondip oqaatigisaa ilumuunngilaq, namminiilivinnissamimmi eqqarsaat nutaajunngilaq, politikeri IA-meersoq politikkikkut oqaaseqaateqarluni taama allappoq.

- Apersorneqarnera nuannersupilussuuvoq inuppalaartuullunilu, Juliane Henningsen allappoq. Naalakkersuisulli siulittaasuata oqaluttuarisaanermik politikerinillu Nunatta namminiilivinnissaanik
sulissuteqartarsimasunik akuerinninnginnera isornartorsiorpaa.

Juliane Henningsenittaaq Aleqa Hammondip namminiilivinnissamik suliniuteqarnermi unamminartunik, pingaartumik aningaasaqarnermut tunngassuteqartunik, ajornanngippallaamik nassuiaanera isornartorsiorpaa.

- Peqqinnissaqarfimmik akeqanngitsumik atuisinnaaneq pilliutigineqassava? Ilinniarsinnaaneq, soraarnerussutisiaqarneq taamatullu nunatsinni naligiinnginnerup annertusinnginnissaa pilliutigineqassava? Namminiilivinnermi atugarissaarneq pilliutigineqassanngilaq.

- Aningaasaqarnermut tunngatillugu akisussaassusilimmik ingerlatsinissaq siulliunneqartariaqarpoq, politikeri illuatungiliuttuneersoq allappoq.