Juliane Henningsen ingerlaaqatigiit oqalugiarfigai

- Silaannaap kissatsikkiartorneranut pissutaaqataasut inuiaat tamarmik akisussaaqataaffigalugit qanoq iliuuseqarfiginiartariaqarpaat, innuttaagunik politikeriugunik suliffeqarfiugunillu, Juliane Henningsen ilaatigut taama oqarpoq.

Silaannaap kissatsikkiartorneranut pissutaaqataasoq CO2 akiorniarlugu, avatangiiseq pillugu suliniaqatigiiffik Danmarkimeersoq, Klimabevægelsen Københavnip aqqusernini ilaasortaminik ullumi ingerlaaqatigiisitsivoq.

"Aput ninitsitserluni nuna nuisiterluni..." kalaallit upernaarsiutinnguatta taallai ilaatigut taamaapput. Piviusuuvorlittaaq silaannaap kissatsikkiartornera innuttaasunut uumasunullu kinguneqapilukkiartormat. Klimabevægelsemit tamanna ernumanartuutinneqarpoq. Inuit Ataqatigiinneersoq Folketingimi Ilaasortaq Juliane Henningsen aggersarneqarpoq Københavnip Rådhusersuata saavatungaani oqalugiariartoqqullugu. Juliane Henningsen-ip oqariartuutigaa silaannaap kissatsikkiartornerata akiorniarneqarnissaa innuttaasut ataatsimut akisussaaffigisariaqaraat.

- Soorunami politikkikkut iliuuseqarfigisinnaasortaqarpoq aammali isumaqarpunga innuttaasut tamarmik akisussaaqataasut iliuuseqarnissaminnut, Juliane Henningsen kaammattuivoq.

Sermip aakkiartornerata ernumanartuunera suliniaqatigiiffimmit oqariartuutigineqarpoq.

Klimabevægelsen, Danmarkimi avatangiisinik illersuiniaqatigiiffinnit arlalinnit tapersersorneqarpoq, soorlu ukunannga: Natur og Ungdom, Det Økologiske Råd, Noah allallu.

Suliniaqatigiiffiullu oqariartuutigaa:

- Qulliit pære-nik sipaarnartunik taarsernerat fjernsynillu qamittarnissai naammanngitsut, allarpassuarnik eqqumaffissaqarpugut, oqarput.