Juliane Henningsen: Ineriartornikkut kingusissut periarfissinneqarlik

Inuusuttut ineriartornermikkut kingusissut ukiunik pingasunik sivisussusilimmik efterskolemi atuarsinnaalernissaannut periarfissinneqarnissaannik, kiisalu ilinniartut allat atugarisaannut assingusunik pineqartarnissaasa qulakkeerneqarnissaanik, Naalakkersuisut suliakkerneqarnissaat pillugu, Inatsisartuni ilaasortap, Inuit Ataqatigiinnersup,

Juliane Henningsenip siunnersuutaa, Inatsisartuni ullumi aamma oqaluuserineqarpoq.

Innarluuteqartut ilinniartitaanikkut ineriartornissaannik ullumikkornit pitsaanerusumik periarfissaqartinneqarnissaat siunersuuteqarnerminut Juliane Henningsenip tunngavilersuutigaa.

- Innarluutilinnut efterskoleriarluni aallarneq ilaanni tassaasarpoq ineriartoqqinnissamut ilinniarnissamullu periarfissatuaq, taamaattumillu tamanna ilinniarnertut allatulli isigineqartariaqarpoq, Juliane Henningsen oqarpoq.

Siunnersuut Naalakkersuisunit tapersersorneqanngikkaluartoq, Inatsisartuni,

Atassut minillugu, partiit sinnerisa attaviitsullu Esmer Bergstrømip siunnersuutaa taperserpaat, taamaalillunilu siunnersuut aappassaaneerneqartigani Inatsisartut Ilinniartitaanermut Ataatsimiititaliaanut ingerlaqqittussanngorpoq.