Aningaasat nunatsinni eqqornerusumik silasiorsinnaanissamut qulakkeerutaassasut
![](/sites/default/files/styles/image_934x467/public/article_images/anette_hartvig_nielsen_dmi.jpg?itok=kh2SnoEU)
Missingersuinerit eqqornerusut, aputit sisoorneranut kalerrisaarut, facebookimik atuisunut silassamik kalaallisut toqqaannartumik nalunaaruteqarneq.
Danmarks Meteorologiske Institutip, DMI-p 4 millionit koruunit danskit aningaasanut inatsisaannit pissarsiani taama atorniarpai.
DMI-p pisortaata tullia, Ulrik Korsholm taama nassuiaavoq. Taassuma politikerit DMI-p nunatsinni suliaanut pitsanngorsaatissanut aningaasanik ukiunut sisamanut immikkoortitsinerat nuannaarutigaa. Aningaasallu taakku innuttaasunut iluaqutaassasut oqaatigaa.
- Ukiut sisamat qaangiutsinnagit aputip sisoornissaanut nutaamik aarlerisaaruteqalissaagut, aappaagortinnaguli silarlummik oqartussanut innuttaasunullu toqqaannartumik aarlerisaaruteqartarnissaq pillugu kalaallit oqartussaasui oqaloqatigalugit aallartissaagut, Ulrik Korsholm oqarpoq.
Silassamik nalunaarutit kalaallisut
DMI ulussaarsuarnissaanik, nittaalartalimmik anorersuarnissaanil sakkortuumilluunniit issangiarnissaanik pingaarnermik nunatta silaannartaatigut imartaatigullu angalasunut ilimasaarusiortarpoq. DMI-lli silarlummik innuttaasunut ullumikkornit toqqaannartumik nalunaaruteqarsinnaaneq angorusuppaa.
Taamaammat DMI-p Facebookimik atuisunut silassamik kalaallisut nalunaaruteqarsinnaalernissaq sulissutiginerorusukkaa, pisortap tullia oqarpoq.
- Facebookimik atuinerunissaq pingaartumillu Facebookikkut kalaallisut atuisartunut silassamik siammasinnerusumik angussisarnissarput kalaallinullu aarlerisaaruteqartarnissarput sammineruniarsariniarparput. Taamaammat 2021-p ingerlanerani tamanna malugineqarsinnaalissaaq, Ulrik Korsholm oqarpoq.
Kalaallit Nunaannut ingerlaarneq
DMI-p nunatsinni silasiorfia Kangerlussuarmiit Nuummut novembarip aallartinnerani nuuppoq. Silasiorfik Issittumi Sakkutooqarfiup illuaniippoq, tassanilu silasiortut marluk Air Greenlandip timmisartuinut, qulimiguuliutaanut Issittumi Sakkutooqarfiullu umiarsuaataanut silasiornermik kiffartuussisuullutik.
![](/sites/default/files/styles/image_934x467/public/article_images/anette_hartvig_nielsen_dmi1.jpg?itok=SmUOQ8_6)
Silasiorfimmiillu politiit annaassiniarnermik suliaqarnerani ikiuisalernissaq aamma siunertaavoq. Silasiortoq, Nuummi DMI-p silasiorfiani silasiortut marluusut aappaa, Anette Hartvig Nielsen, taama nassuiaavoq. Naallu DMI nunatsinni immikkoortortaqarfeqaraluartoq aamma silaannakkut imaatigullu angallannermut silassamik nalunaaruteqartaraluartoq, allafik Danmarkimiittoq nunatsinnut silassamik ilimasaaruteqartartuuvoq.
- Silassamut ilimasaarut suli Danmarkimeersuusarpoq, tamannali maannga nuukkiartuaarsinnaassagipput pilersaarutaavoq, taamaalilluni Kalaallit Nunaannut attuumassuteqartut tamarmik Kalaallit Nunaanniilissallutik, Anette Hartvig Nielsen oqarpoq, nangillunilu:
- Kalaallit Nunaanniikkaanni tamaanilu suligaanni taava silap qanoq ittarnera sungiussassaasarpoq, najukkallu qanittorisaani pissutsit silap qanoq innissaanut sunniuteqarsinnaapput.
Aputip sisoortarneranut immikkut ilisimasallit suleqatigerusukkaat
DMI innuttaasunut silarlunnissaa pillugu toqqaannartumik aarlerisaaruteqartalernissami saniatigut, aningaasanut inatsimmik aningaasat aputip sisoornissaanut aarlerisaarutinut aamma atorneqassapput.
DMI taamaattunik ullumikkut atortorissaaruteqanngilaq. Taamaammat silasiorfiup nunat, soorlu Island, Norge Østrigilu, aputip sisoortarneranut aarlerisaarinermut atortorissaaruteqartut, misilittagassarsiorfigissagai, Ulrik Korsholm nassuiaavoq.
- Silasiornermut pitsaanerpaanik atortoqarpugut ilisimasaqarnerpaallu suleqatigalugit aputip qaqugukkut sisoortarnera siulittorsinnaalissavarput. Taamaalilluta pisunniartut qamuteralanniartulluunniit qaqugukkut immikkut mianersortariaqarnersut oqaatigisinnaalissavarput, taanna oqarpoq.
Kalaallit Nunaanni Politiit oqarnerat naapertorlugu nunatsinni apummik sisoortoqarneratigut 2019-imi 2017-imilu ajunaartoqarnikuuvoq. Politiit aputip sisoorneratigut toqusut pillugit kisitsisaateqanngillat. Taamaammat politiit nalunaarsorsimanngisaannik akuuffigisimanngisaannilluuniit aputip sisoorneratigut ajunaartoqarnikuusimasinnaavoq. Kalaallit Nunaanni Politiini pinaveersaartitsinermut misissuinermullu immikkoortortaqarfimmi aqutsisoq, Mikkel Høj Svendsen mailikkut akissuteqarluni paasissutissiivoq.