Siulittaasunngorlaaq: Ineqarnermut pisinnaatitaaffeqarneq sammineqarnerusariaqarpoq
Kalaallit Nunaanni Inuit Pisinnaatitaaffii pillugit Siunnersuisooqatigiit februarimi ataatsimiilerunik meeqqat innarluutillillu pisinnaatitaaffii oqaluuserisassaannut ilaapput.
Ineqarnermut pisinnaatitaaffeqarneq immikkut sammineqarnerusariaqartoq iliuuseqarfiginerusariaqartorlu, siulittaasunngorlaap Sara Olsvigip oqaatigaa.
AAMMA ATUARUK Sara Olsvigip Unicefip Nuummi allaffittaava siuttuuffigissagaa
- Ineqarnermut tunngasunik nunatsinni annertuumik unammillernartumik inissisimavugut. Taamaammallu aamma ineqarnermut pisinnaatitaaffeqarneq pisinnaatitaaffiit tunngavigalugit isiginissaa annerusumik sammineqartariaqartutut isigivara.
Angerlarsimaffeqanngitsut ukkataralugit
Iliuusissanik pilersaarusiortariaqarlutik ukiumilu nutaami suut samminerussanerlugit aalajangertariaqarlutik, Sara Olsvigip oqaatigaa.
Nunatsinni 2017-imi angerlarsimaffeqanngitsut Naalakkersuisut naapertorlugit 841-upput.
Taakkulu ukkatarineqarnerusariaqartut, siulittaasoq oqarpoq:
- Inunnut innarluutilinnut tulluartumik ineqartitsinissaq pisinnaatitaaffiummat immaqa taanna immikkut sammilluarnerullugu aamma erseqqinnerulersinnavoq pisortaqarfiit qanorpiaq pisussaaffeqarnersut ineqarnermut pisinnaatitaaffeqarneq eqqarsaatigalugu.
AAMMA ATUARUK Råd for Menneskerettigheder skal fjernes fra Selvstyretårnet
Kalaallit Nunaanni Inuit Pisinnaatitaaffii pillugit Siunnersuisooqatigiit nutaat novembarip 29-ani ivertinneqarput. Tassani Sara Olsvig siulittaasunngorpoq Anders Meilvangilu siulittaasup tulliatut toqqarneqarluni.
Naalakkersuisut inuttaliisarunnaarput
Naalakkersuisut 2019-imi inatsisitaaq atuutilermat Siunnersuisooqatigiinni inuttaliisarunnaarput.
Siunnersuisooqatigiit 13-inik ilaasortaqarput, taakkunani qulit Inatsisartunit toqqagaallutik. Ilasortat inuiaqatigiinni assigiinngitsuneersunit massakkut innersuussaasalerput.
Meeqqat Illersuisuat, Innarluutillit Illersuisuat Naligiissitaanissamullu Siunnersuisoqatigiit siulittaasuat ilaasortanut ilaapput.
Siunnersuisooqatigiinni ilaasortanngorlaat:
- Sara Olsvig, siulittaasoq
- Anders Meilvang, siulittaasup tullia
- Níke Berthelsen, forretningsudvalgsmedlem
- Arnajaaq Lynge, Landsforeningen Autisme Kalaallit Nunaat
- Lise Mørup Dalgaard, Nunatsinni Advokatit
- Annemette Nyborg Lauridsen, Ilisimatusarfik
- Sofie Lennert, Kattuffik utoqqaat nipaat
- Henrik Sandgreen, KNAPK
- Hans Reimer, KNIPK
- Ludvig Larsen, SIK
- Aviâja Egede Lynge, Meeqqat Illersuisuat
- Christina Johnsen, Inuit Innarluutillit Illersuisuat
- Kathrine Bødker, Naligiissitaanissamut Siunnersuisoqatigiit siulittaasuat
Ilaasortanut suliassarpassuaqartoq, Sara Olsvigip tikkuarpaa.
Ineqarnermut pisinnaatitaaffiit saniatigut nunatsinni meeqqat pisinnaatitaamminnik ilisimasakippallaartut, siulittaasoq oqarpoq.
FN-ip isumaqatigiissutai
Kiisalu inuit pisinnaatitaaffiinik sakkussat pingaarutillit soorlu FN-ip isumaqatigiissutai Kalaallit Nunaannut atuuttut, innarluutillit pillugit isumaqatgiissut kiisalu Nunat inoqqaavisa pisinnaatitaaffii pillugit Naalagaaffiit Peqatigiit nalunaarutaat ukkatarineqarnerunissaat nakkutigineqarnerulernissaallu sulissutigissallugu, Sara Olsvig oqarpoq.
