Ilisimatusartut sisamat: Ilisimasatsinnit inuiaqatigiit pitsanngorsarusuppagut
Ilisimatuut nunanit assigiinngitsuneersut tikeraat nunatsinneersullu Polar Researcg Day-mi saqqummiipput, nunatsinneersullu sisamat immikkuullaripput.
Ilisimatusartut ilisimatusaataat sooq pingaartuunersut taakkununnga apeqqutigaarput. Uanilu ilisimatusartut ima akissuteqarput.
- Ph.d. tuluit naalisagaraat latineritut philosophiale doctori, tassalu filosofimi doctori.
- Ph.d.-nngorniarneq Ilisimatusarfimmi nalinginnaasumik ukiuni pingasunik sivisussuseqartumik ilitsersorteqarluni ilinniagaavoq.
- Ph.d.-tut ilinniagaq ilisimatuutut allaatigisaqarnikkut naammassineqartarpoq.
Tusarfik: Den Store Danske
Naja Karina Stenholdt:
- Inuiaqatigiinni alliartorneq atugarissaarnerlu misissugaraara. Inuiaqatigiit namminneq isiminniit inuulluataarneq qanoq paasisarneraat qanorlu isumaqartinneraat paasissallugu uani soqutigisaraara.
Naja Carina Steenholdt taama akivoq nangillunilu:
- Tusagassiutitigut tusagaqartaqigatta tamanna pingaartissimavara . Ilaatigut ajunngitsunik, ajortunik amerlasuutigullu ajorluinnartunik. Aamma innuttaasut qanoq innerannik aperigaanni, ajunnginnerartartut, misissuinerit takutippaat. Tamannalu soqutiginarpoq. Tamanna ilisimanerusariaqarpagut. Taamaammat nunatsinni inuuneq pitsaasoq qanoq ittuunersoq paasiniassallugit pingaaruteqartoq, Naja Karina Steenholdt oqarpoq.
Manumina Lund Jensen:
Taassuma ilisimatusartoqataa Manumina Lund Jensen kalallit kulturianni pingaartumik aamma ilisimatusaateqarpoq. Tassa kalaallit qimmiata oqaluttuarisaanera.
Meeqqat atuarfiat arlalitsigut isornartorsiorneqangaatsiartarpoq. Ilinniartitsisussaaleqivallaaqaagut, ilinniartitsisut piginnaasakippallaaqaat, atuarfimmi qinngasaarisoqarpallaaqaaq.
Sunaana ajornartorsiutaasoq, qanoruna iliornikkut aaqqinneqarsinnaasut. Ilaatigut tamakkorpiaat inuusuttut marluk meeqqat ilisimatusaatigileruttorpaat.
Ilisimatuunngorniat marluk meeqqat atuarfiat pillugu ilisimatusarnermut ukiunik pingasunik atuiniarlutik aalajangersimapput.
Louisa Pindstrup:
Taakkuli ilisimatusaataat assigiinngeqaat. Aappaata, Louisa Pindstrupip, anitsiarfimmi klassimilu pisut malinnaaffigeqqissaarpai.
- Meeqqat atuarfimmiittarnerat misissorpara. Atuarfimmi klasse aalajangersimasoq pifissami aalajanersimasumi malinnaaffigeqqissaarpara, atuaraangamik anitsiaraangamillu sulerisarnersut paasiniarlugit.
Tassami atuarfiup atuartut ilikkagaqarnerorusulertinniartussaallugillu ilinniarnerorusulersinniartussaavai. Tamatigulli taamaappasinnginnami, taamaammat meeqqatt atuarfimmiikkaagata susoqartarnersoq misisortariaqarparput.
Miillaaraq Lennert:
Ilisimatusartup aapparaa Miillaaraq Lennert. Taassuma meeqqat atuarfiat qanoq pitsanngorsarneqarsinnaanersoq ilisimatusaatigaa.
Taamaammat meeqqat atuarfiata sutigut iluarsaateqqinneqarsimanera, tamakkua qanoq atuutilersinneqarsimaneri, siunertaasutut ingerlanersoq qanoq qulakkeerneqartarnersoq, naammassisanillu uuttuinermi paasissutissat suut atorneqartarnersut, taassuma misissorpaa.
- Uannut pingaaruteqarpoq meeqqat atuarfiat ukiorpassuit oqallisigineqartarpoq ingerlalluanngitsoq. Taava taanna aaqqinniarutsigut, ingerlallualissappat qanoruna iliortariaqartugut? Paasissutissanuku qanoq atorsinnaagigut? Pitsanngorsaaniarnermi, Miillaaraq Lennert oqarpoq.
Ilisimatusartut taakku marluk decembari aallartissimatsiartoq Polar Research Nuummi ingerlanneqarmat saqqummiipput.
Nunatsinni issittumilu ilisimatusartut ataatsimeersuarnermi inuit 220-t nunanit assigiinngitsunit 15-ineersut peqataapput.
Ph.d-nngorniarut saqqummiinissaanut akisussaasup Ilisimatusarfimmi adjunktip Rasmus Leander Nielsenip oqarnera naapertorlugu, sapaatip akunnerata ingerlanerani saqqummiunneqartuni taakku saqqummiussinerat pingaarnersaavoq.
- Nunatsinni kalaallit pitsaasumik ilisimatusartut nittarsaappagut. Ilisimatusarfimmik tunuliaqutaqartut. Tassa ilippanaateqarluartut ualimut ilisaritippagut, taanna oqarpoq.
