Juaakap asanninnilersaarutai
”Yuaca”. Taamatut Juaaka Lyberthip atini allappaa nuusiamini nutaami ”Naasumik paju”-mi. Ukiorpassuarnik kissaatigiuarsimasani taamaasilluni piviusunngortippaa tassalu asanninnilersaarutaannarnik imalimmik nuusiornissaq.
Juaaka Lyberthip oqaluttartup nuutai ”Kalaaleqatikka – mine frænder” aamma ”Oqaluttuat – fortællinger” saqqumersereernikuuai, kingullerlu 1983-mi saqqummerpoq. Taamanikkut Juaakap Aasivik Band appisimaaqatigisarpaa Danmarkimi nunatsinnilu angalaaqatigalugit nipilersoqatigisarlugit. Aammattaaq saqqummersinnikkuaa ”Fam”, meeqqat Uummannap sulluani aasiveqataasut peqatigalugit immiussaasoq.
Toqqorsivimmullu aamma alakkarsimagujoq asanninnilersaarusiani ”Lis Mari” nutaanngorlugu immiussimallugu. Taanna radiohusitoqqami 1970-kkut qeqqanni immiussaavoq, taamanikkullu Juaaka inuusoqaluni aallakaatitassiullattaasarpoq.
- Taamanikkut isumaqarsimavunga asanninneq asannilernerlu inuusuttunuinnaq atuuttoq. Kingornali paasivara sakkortuumik asannilersoorneq qaangiukkaangat suli atasartoq, Juaaka Lyberth oqaluttuarpoq.
Aamma piukkoorpoq 90-liiguni asanninnilersaarumik erinarsuataarniarluni – nammineq oqarneratut taamatunngooq utoqqaatigilissaguni.
Taamanikkornissaanut atulersaagaa tassaavoq nuutip ateqaataa ”Naasumik paju”, nuliaminunngooq Asii Chemnitz Narupimut atorusukkamiuk.
- Inummut inuuninni ingiaqatigisannut qujassutitut. Utoqqalilernerni asanninneq tatigeqatigiinnermik toqqissisimaqatigiinnermillu imaqarmattaaq, naak inuunerup ukialerneraniikkaluarluni. Neriuppunga allat aamma nuannarissangaat, Juaaka Lyberth oqarpoq.
Atini "Yuaca"-mik allassamaaleramiuk qitornarsiamik Koreami inunngortuusut nuna inunngorfiat isumassarfigisimallugu aamma unnerpoq.