Juaaka Lyberth isiginnaartitsisartut siulittaasuattut toqqarneqarpoq
Siulersuisut tallimanik ilaasortaqassapput, siulittaasutullu toqqarneqartoq siulleq tassaavoq nipilersortartoq, kulturikkullu illorsuup Katuap pisortarisimasaa Sisimiunilu Taseralimmi pisortaasimasoq Juaaka Lyberth.
Namminneq kajumissutsiminnik isiginnaartitsisartut sinnerlugit Juaaka Lyberth toqqarneqartoq, Naalakkersuisut nalunaarutigaat.
Namminneq kajumissutsiminnik isiginnaartitsisartut maannakkuugallartoq kattuffeqanngillat, Juaaka Lyberthilu sinnerlugit toqqagaavoq, soorlu aamma siulersuisussani siulittaasussatut toqqarneqartoq.
Siulersuisussat katillugit tallimanik ilaasortaqassapput:
Juaaka Lyberthip saniatigut ilaasortanngortussat tassaapput Else Danielsen, isiginnaartitsisartut sinnerlugit KAISKA-mit innersuussaq, Arnajaraq Støvlbæk, KANUKOKA-mit innersuussaq, Atuakkiortullu Peqatigiiffiannit innersuussutigineqartoq Hans Anthon Lynge.
Ilaasortat tallimassaat Kalaallit Nunaata isiginnaartitsisarfiani sulisussat akornannit toqqarneqarumaarpoq, januaarip aallaqqaataata kingorna toqqarneqarumaarluni.
Siulersuisussat ukiup nutaap aallartinnerani siullermeersumik ataatsimiissapput, tassani inissititerumaarlutik, isiginnaartitsisarfiullu aallartisarnissaa pilersaarusiorneqassalluni.
