”Tupiginngilara illuatungiuliuttut aperimmata naalakkersuisooqatigiinnersugut ”. Taama oqarpoq aningaasaqarnermut naalakkersuisoq Josef Motzfeldt IA, naalakkersuisoqatigisani Finn Karlsen, Atassut, politikkikkut aningaasaqarnikkullu nalunaarusiap qanittukkut saqqummiunneqartoq pillugu isumaqataannginnerarluni nalunaareersorlu.
Aalisarnerup annertuumik allannguuteqarnissaa nalunaarusiami oqariartuutigineqarpoq. Sinerissap qanittuani avataanilu aalisarnermut avitsisarneq ilaatigut atorunnaassalluni. Finn Karlsenip tamanna akerlilerpaa, oqarluni sinerissap qanittuani avataanilu aalisarnermik immikkoortitsineq atorunnaarsittariaqanngitsoq.
Sermitsiap Inuussutit pillugit immikkoortortaanut sapaatip akunnerup siuliani taama oqarpoq.
Josef Motzfeldt isumaqarpoq aalisarnerup iluanaarutaalerneratigut landskarsi amerlanerusunik isertitaqalertariaqartoq.
Josef Motzfeldt-ip kissaatiginartippaa aalisarnermut inatsisissaq inatsisartuni ukiamut aatsaat oqaluuserineqassasoq, attuumassuteqartut aasap ingerlanerani tusarniaaffgineqareerpata.
- Avataasiorluni aalisarneq 2 milliardi koruuninik kaaviiaartitsisuusarpoq, landskarsili raajanut akitsuutitigut taamaallaat 5 millioni koruuninik isertitaqartarpoq, Josef Motzfeldt oqarpoq.
