Josef Motzfeldt: Oqallinnerit maanna uummaarinnerupput

Inatsisartuni oqalliseriaaseq nutaaq inatsisartut siorna ukiaanerani ataatsimiinneranni atuutilersinneqarpoq, oqalliseriaatsilli nutaap anguniakkat eqqorpallaarsimagunanngikkai, Inatsisartut siulittaasuata Josef Motzfeldtip oqaatigaa, siunnersuummullu nutaamut Inatsisartut maanna ataatsimiinnerminni qisuariaataat tunngavigalugit isumalluarluni:

- Ullut ataatsimiiffiusimasut maanna quliinnaapput, oqaaseqarnissamulli killiliussat pillugit maalaarutigineqanngillat. Akerlianik siulittaasoqarfimmiit isumaqarpugut oqallinnerit qiimanerulersut, uteqattaarinerillu ikileriartut, taamaammat isumaqarpunga siulittaasoqarfimmiit nutaatut saqqummiussarput siunnerfimmut naapeertuuttoq, inatsisartullu tamanna piumasimagaat, Josef Motzfeldt oqarpoq.

Angusaqarfiunerusumik uummaarinnerusumillu oqallittoqartalernissaa siunertaralugu oqalliseriaatsimik nutaamik tunuliaqutaqarnissaq 2008-mi siunniunneqaraluarpoq, Josef Motzfeldtilli oqarneratuut taamanikkut iluatsitsiffiuallaanngitsumik.

Oqalliseriaaserli maanna tassa nutarterneqaqqilerpoq, sapaatillu-akunnerata ingerlanerani ullut ataatsimiiffiit aamma allanngortinniarneqarlutik.

Inatsisissatut siunnersuutit pingasoriagassat siullermeerneqarlutik oqallisigineqarnissaannut piffissaqartitsiniarnissaq pillugu sapaatip-akunnerata ingerlanerani ullut ataatsimiiffiit pingasuupput, apriili naatinnagu naammassiniarneqassallutik.

Maajip aallartisimalaalernerani ullut ataatsimiiffiit marluinnanngortinniarneqarput, siunnersuutit aappassaanneerneqarnissaannut ataatsimiititalianit isumaliutissiissusiorfigineqarnissaat piffissaqarfigineqarniassammata.

Oqalliseriaatsimilli nutaamik pisariaqartitsisoqarnera Josef Motzfeldtip ima nassuiaateqarfigaa:

- Inatsisartut ataatsimiinnerat ataaseq maleruagassat assigiinngisitaartut najoqqutaralugit ingerlanneqarnissaa tulluartuusorinnginnatsigu, siulittaasoqarfimmiit taama pisariaqartissimavarput, Inatsisartut siulittaasuat Josef Motzfeldt oqarpoq.