Josef Motzfeldt: - Nunarput EU-mut sunniuteqarnerusariaqarpoq

EU-p issittoq pillugu politikkianut nunarput sunniuteqaqataanerusariaqartoq, nunanut allanut tunngasuni naalakkersuisoq Josef Motzfeldt isumaqarpoq.

Tamannalu pillugu issittumi nunallit EU-milu ilaasortat nunatsinni ataatsimeersuarnissaat anguniarlugu maanna sulissutiginnilerpoq.

- EU ataatsimoorussamik Issittumut tunngasumik ullumikkut politikkeqanngilaq. Taamaammat 1993-imili Kalaallit Nunatsinninngaanniit Naalakkersuisuni issittumi igalaanik taallugu ikkussaqarpugut, taannalu EU-p issittumi nunat qanoq politikkeqarfigissagaanik suinertaqartumik suliaqarnissamik oqariartuutiginnittutut taaneqarsinnaavoq, Josef Motzfeldt oqarpoq, nangipporlu:

- Kisiannili ukiut ingerlaneranni EU-mi nunat imminnut nassaariniarnerat immaqa pisariusimaqinermat Issittumi tunngasumik qanoq politikkeqarnissartik aalajangersumik suli maannakkumut ilusilersimanngimmassuk massakkut isumaqarpugut issittormiuusugut uagut naalagaaffiit taamak amerlatigisut taamalu pissaaneq angitigisoq EU-miittoq sunnerniassagutsigu uagut tassaasariaqartugut EU-p issittumi politikkeqarnissaanut ilusileeqataasussaq, Josef Motzfeldt oqarpoq.

Taanna qalleqqissaavoq tamanna pillugu siunnersuuteqarsimalluni Issittumi nunallit EU-milu ilaasortat nunatsinni aappaagu ataatsimeersuassasut.

Josef Motzfeldt aperaarput nunarput EU-miit anereernikuulluni qanoq ililluni taama piumasaqarsinnaassasoq?

- Isumaqarpunga ilisimaneqartariaqartoq aasaq EU-lu isumaqatigiissuteqartugut qanimut suleqatigiinnissamik siunnerfeqartumik. Taamaammat tamannna uppernarsaataavoq EU-mut ilaasortaanngikkaluarluni EU nunallu EU-p soqutigisaqarfia imminnut suleqatigiissinnaasut, Josef Motzfeldt oqarpoq.

Josef Motzfeldt aamma oqarpoq siunnersuutini Nunani avannarlerni suleqatigiinnermut ministerinit taperserneqartoq.

Ataatsimeersuarnissap 2008-mi pinissaa naatsorsuutigineqarpoq.