Josef Motzfeldt: Kalaallit tusarnaartuuginnarput

Qinikkat nuimasut nunatsinnut tikeraareeraangamik silap pissusaata allanngoriartornera pillugu nunarsuarmioqatitsinnut nalunaariartuuteqartarnerannut isiginnaartuuginnartarlutalu tusarnaartuuginnartarpugut, silallu pissusaata allanngoriartorneranut tunngatillugu naalakkersuisut politikkeqalernissaat piffissanngorpoq. Inuit Ataqatigiit sinnerlugit inatsisartunut ilaasortaq Josef Motzfeldt taama oqarpoq.
Allattoq Mads Lynge
maajip 13-at 2008 11:14

- Naalakkersuisut tassaanerusimapput ungavaamillutik tusarnaartut. Pingaarutillit tikeraaraangata nunatsinni naalakkersuisut taakku oqaasiinut naalaartuuginnartarput. Qanoq iliuuseqarniarnermut tunngatillugu tikeraat periarfissiilluarput tusagaqarnissaminnik, uagullumi aamma taakku aqqutigalugit avammut oqaaseqarnissarput periarfissatsialaavoq, pingaartumik issittumi kulturitoqqat silap pissusaata allanngoriartornera pissutigalugu nungutaagaluttualersut pillugit avammut oqariartuuteqarnissarput, tikeraat periarfissikkaluarpaat atorneqaratilli, Josef Motzfeldt Inuit Ataqatigiinneersoq oqarpoq, nangipporlu:

- Nunatta tusagassiuutit aqqutigalugit avammut oqariartuuteqanngittarnera iluarsineqartariaqarpoq. Ilulissani ataatsimiinnissaq eqqarsaatigalugu, Københavnimilu aappaagu ataatsimiinnissaq eqqarsaatigalugu iliuuseqartoqartariaqalerpoq, nunarput nammineq isummaminik saqqummiussaqarsinnaasariaqarpoq. Silap pissusaata allanngoriartornera nunatsinnut sunniuteqaatai ersarinnerusumik saqqummiunneqartariaqarput, Jsef Motzfeldt oqarpoq.

Nunanut allanut tunngatillugu naalakkersuisinnikkut ingerlatsineq pillugu nassuiaat inatsisartuni ullaap tungaa oqallisigineqarpoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq