Josef Motzfeldt: Isumalluarnarpoq nukiilli tamaasa atortariaqarpavut
Puisit amiinik suliaqarsinnaaneq tuniniaasinnaanerlu inatsisiliornikkut Belgiami inerteqqutaalersinniarneqartoq, EU-p inatsisaanik unioqqutitsinertut taallugu atorunnaarsinniarneqarpoq. Belgiamiut Danmarkimi aallartitaat Marc van Craen, naalakkersuisumit aamma nunatta EU-mi aallartitaanit Lars Vesterbirkimit ataatsimeeqatigineqareerpoq, Kalaallit Nunattalu nunanut allanut naalakkersuisua Josef Motzfeldt isumalluarnerulerpoq, nukiilli tamaasa atorlugit, Belgiap inerteqquteqalersitsiniarnerata Europami nunanut allanut, soorlu nunatsinneersunik puisit amersiniarluartartunut, siaruannginnissaa, sulissutigisariaqarnerarpaa.
-Belgiamiut inerteqquteqarnerat nunani allani issuarneqarluni ilaasortanut tamanut atuutsinneqalissappat Danmarkimut, Sverigemut, Estlandimut, Letland Littauenimullu puisit amiinik eqqussisinnaajunaassaagut. Taamaalilluni nunatsinni piniartut ullumikkut miluumasunik imarmiunik killilersuiffigineqarnermik saniatigut aamma silaannaap allanngoriartornera annertoorujussuarmik eqqugaareersut suli sakkortunermik anigoruminaatsorujussuarmillu eqqugaanissaat akiorniarlugu massakkut nukigut tamaasa iliuuseqarniarsarivugut, Josef Motzfeldt oqarpoq, nangillunilu.
- Aallartitap inuttut oqaloqatiginera tutsuiginartutut malunnartorujussuuvoq, tassani soorunami aasaru juunimioqqooqaaq Belgiami parlamentimut qinersisoqarnerata kingornatigut pissutsit qanoq ikkumaarnerat apeqqutaassaaq. Aamma EU-kommissionimi – Danmarkimi nunanut allanut ministereqarfik suleqatigalugu ilumut inatsisip taamaattup sunik unioqqutitsinerunera atorunnaarsitsiniarnermik kinguneqartissallugu suliniutivut qanoq inerneqarumaarnersut nalunarunnaassaaq, kisianni malunnarpoq ambassadøri uagutsitut inatsisinik atuititsiniarluni ilungersoqataarusuttoq, sapinngisani tamaat.
Josef Motzfeldt isumaqarpoq isumalluarnissamut pissutissaqartoq, pisariaqarnerarpaali nunatta tamaviaarluni paasisitsiniarnissaa.
-Nukiit silatussuseq pinnagu kisiannili misigissutsinik aqunneqartorujussuit akiorniagassaraavut, tamakkulu uumasunik nujuartanik atuiniarnitsinni qaqugumulluunniit nungunnavianngillat. Pisariaqarpoq pingaaruteqarlunilu inatsisinik taamatut isikkulinnik soqutigisaqarani atuutsitsiniarnerit siorngersimaarniassallugit nukigullu tamaasa pissutsinut piviusunik paasisitsiniaajuassalluta.
Aningaasaqarnermut Nunanullu allanut naalakkersuisoq Josef Motzfeldt taama oqarpoq. Belgiamiut Danmarkimut, Savalimmiunut Kalaallillu Nunaannut aallartitaat Marc van Craen Belgiami oqartussanut, nunatta piujuaannartitsinissaq tunngavigalugu piniarnermik ingerlatsinneranik, paasisitsiniaaqataassalluni ippassaq unnukkut neriorsuivoq. Belgiami parlamentimut qinersisoqassaaq juunip qulingani.
