Josef Motzfeldt: -Ernumanerit paasisinnaanngilakka
Kamanneq ilaqutariillu siunissami aningaasaqassusaannut tunngatillugu ernumanerit. Tamakkuupput erngup innaallagissallu akiisa assigiikkunnaarnerat nangillugu ukiortaamit akigititaalersunut tunngatillugu tusartualikkavut.
Pissusilersornerit ernumanerillu aningaasaqarnermut naalakkersuisup Josef Motzfeldtip paasisinnaannginnerarpai.
- Tassami sunaluunniit nalinginnaasumik inuuniarnitsinni atugaq akitsoraangat naammagittaalliuutit takkuttarnerat tupinnartuunngikkaluarpoq, kisianni una innaallagissamut innermullu akiliutaasartoq 2004-mili taamanikkullu naalakkersuisut akisussaasut sineriammi ataatsimiititseqattaarnikkut tusarliutereerpaat. Aamma tusagassiuutitigut innuttaasunut tamanut tusarliutereerpaat akitsoriarfiusussat ukiut tamaasa 10 procentimik akitsuusertassasut 2005-imiit 2009 ilanngullugu. Aningaasaqarnermut naalakkersuisoq oqarpoq nangillunilu.
- Taamanikkulli ilisimatitsissutaasut ilagi vaat innuttaasut namminneq periarfissaqartut qanoq nunaqarfimminni illoqarfimminnilu innaallagissiornermut imeqarnermullu tunngasut qanoq ilillugit akikillisarnissaannut, kommunertik peqatigalugu. Taamaattumik isumaqarpunga maanna naalakkersuisuni nukissiornermut akisussaasuusup qanoq saqqummiinissaa uagut naalakkeruisut sinnerisa utaqqiinnassagipput. Josef Motzfeldt oqarpoq.
SIK-p siulittaasuata Jess G. Berthelsenip ilaasortami aningaasaqassutsimikkut eqqugaanissaat pillugu ernumanera paasisinnaanngilaa. Akinillu allanngortitsineq nunaqarfinnik matooraanerunngitsoq erseqqissaatigaa.
- Naamerluinnaq. Paasisitsiniaalluni angalanermi tamakkua tamarmik tikinneqareerput. Nunatsinni naalagaaffiup nunasiaagallarnerup nalaaninngaanniit pissutsit qimakkiartorumallugit naalakkersuinikkut oqallinnerup nassatarisai tamakkua allatut ajornaqaaq tunngavia tikillugu nammineq qanoq iliorsinnaanerput toqqammavigalugu allanngortissinnaaneripput unammisassatut naalakkersuinikkut inuiaqatigiinnut saqqummiussaavoq. Nunaqarfinnik inuerusaanissaq naalakkersuinikkut partiit sumilluunniit anguniagarineraat uanga ilisimanngilara, nangippoq. Imalu naggataagut erseqqissaateqarluni.
- Naalakkersuisoqatigiit nunaqarfinnik inuerusaanianngillat. Innaallagissamut 5-7 procentip akornaniiginnartoq inuerusaanertut taaneqassappat isumaqarpunga eqqortuliornerunngitsoq.
Josef Motzfeldtip oqaatigaa, inatsisartut 2007-ip ukiaani ataatsimiilerpata assigiimmik akeqarunnaarsitsineq pillugu nalunaarusiamik saqqummiisoqarnissaa ilimagigini.
Aamma nunaqarfinnut kaammattuutigaa, suliat kiffartuussinermut tunngasut assigiikannersut ataatsimik teknikerilerlugit sipaarfissanik ujartueqqullugit.
