Jørgen Isak Olsen toquvoq

Nunatsinni timersornermik aallussisut aliasupput.

Siornatigut assammkik arsartartoq, nammineq piumassutsimik sungiusaasuullunilu siulersuisuni suleqataasartoq Jørgen Isak Olsen toquvoq. Assammik arsartartut kattuffiat TAAK, arsaattartut kattuffiat KAK aamma timersoqatigiit kattuffiat GIF taama nalunaarput.

Jørgen Isak Olsen, Ernimik taaneeqartartoq Nunatsinni timersornermi malunniuteqarluartuuvoq.

Assammik arsallaqqissutut ilisimaneqarpoq timersoqatigiiffik NÛK peqataaffigalugu arlaleriarluni pissartaaqataasarluni sukkassutsimigut amerlasuunit eqqaamaneqarluni. Saassusseriasaarnermi aallarsaraangami taamani angusamassaanngivippoq.

Assammik arsarnermi ilimasarpassuarminik ingerlatitseqqikkusuttuuvoq. NÛK-mi, TAAK-mi aamma GIF-mi siulersuisuni ilaasortaasarpoq. Suleriuseraa siumut pilersaarusiorsinnaassuseq ukiut arlallit siumut isigalugu sulerusuttarluni.

Sungiusaasutut NÛK-mi arnani sungiusaasunngorami inuusuttuaqqat aallartiffigai. Siunniussimavaa taakku inersimasunngorunik assammik arsallaqqissuussasut. Eqqissisimasumik pissuseqartuunermigut arsartut toqqissisimatittarpai ataqatigiinnermut iluaqutaaqisumik.

Arsartut kisimik  ilaatinneqanngillat. Arsartut angajoqqaavi Ernip suliniutaanut tapersersuillutik suleqataapput tamatumalu kingunera ullumikkut ersaripput. Arsartuni taakkunani arlallit inersimasuni nunanut allanut unammisartuni pingaarutilittut inissisimasuupput aammalu 2023-mi Norgemi Danmarkimilu VM-rtoqarmat Nunarput sinnerlugu unammeqataallutik.

VM-imut anngunniunneq

Ernip isiginnittaasa malillugu timersornermi pikkorissuinnaat peqataassanngillat. Taamaattumik Lykke liga-mik aallartisaaqataavoq. Tassani peqataasinnaapput innarluutillit imaluunniit arsalerinermut suli ilinniartut. Suliniummi qitiuvoq tamanut inissaqartitsineq nuannersumik ataatsimoorneq pingaartinneqarluinnarluni.

Jørgen Isak Olsen, Erni, aamma TAAK-mi siulittaasuunikuuvoq, ilaatigullu suliniutigaa kattuffiup kalaallisut atertaarnissaa GHF qallunaatuumiit Grønlands Håndboldforbundimit naalisagaasoq taaserlugu. Timersornerup silarsuani aamma eqqaamaneqarpoq angutit VM-imut anngunnniunnerisa Pan-Am-ip Nunatsinni pinissaanut ilungersuuteqartutut. 

2018-mi tamanna piviusunngorpoq ukioq taanna junimi unammersuartoqarluni nunat pikkorissorsuarnik unammisartullit Argentina Brasilialu peqataasunut ilaallutik. Taamani Nunarput VM-imut anngutinngiikkaluartoq ullut taakku Nuummi sineriassuatsinnilu eqqaamaneqarput KNR-TV-mi toqqaannartumik aallakaatitsisoqarnerani timersortarfissuarmilu Inussivimmi isiginnaariat ataatsimoorneq kimittooq misigimmassuk ulloq manna tikillugu eqqaamaneqartumik.

Aaqqissuussaanermi Ernip piginnaasai maluginiarneqarput. Taamaattumik 2019-miit 2023-mut GIF-mi siulersuisuni ilaasortaavoq. Siumut isigisumik siulersuunermi eqqarsartaatsini ilakkuminartuuninilu pillugit eqqaamaneqarluni.

Inuussutissarsiornermi allaffissornermi sulisuuvoq. Siornatigut akileraartarnermut pisortaqarfimmik taaneqartartumi sulisooreerluni piniarnermut aalisarnermullu naalakkersuisoqarfimmi pisortanngorpoq.

Ukiorpassuit pisortani sulereerluni Jørgen Isak Olsen, Erni, ukioq manna arsaattartut kattuffianni KAK-mi allaffissornermi pisortanngorpoq.

Erni Maniitsumi 1969-mi inunngorpoq siusippallaarujussuarmik toqunissami tungaanut oqalunnermini Maniitsormiorpalussutsi attallugu.

Jørgen Isak Olsenip, Ernip, eqqaaneqarnera ataqqinartuuli.