Jordanimi danskit nioqqutissannik pisiumajunnaarput

Araberit allat danskit tunisassiaannik pisiumajunnaarnissaat Jordanimi suliniuteqartut neriuutigaat, taamaalillutik Danmarkip utaqqatsernissaa kingornalu musliminik ajuallatsitseqqissanani neriorsuinissaa anguniaramikku.

Jordanimi suliniaqatigiit Danskit tunisassiaannik piseqqusinatik kaammattuutitik, allagartarsuarnut 1 milliuuninik amerlassusilinnut naqiterlugit muslimit naalagaaffiini tamani nivinngartorniarpaat. Allagartarsuarni allassimavoq; ”Live without it” – nutserlugu ”Makku atornagit inuugit”, Danskit Hollandimiullu tunisassiaat assilisimallugit. Suliniaqatigiit Holland ilanngussimavaat, Hollandimiup Wilderip filmiliaa islamisiortunik assuarinnittoq avoqqaarinnissutinut ilanngukkitsik takutinniarlugu. Suliniaqatigiit imminnut taagorput, “Pruffiitip ataqatigiissippaatigut”, tassanilu ilaasortaapput inatsisilerituut, politikerit aviisinilu aaqqissuisut. Suleqatigiiffimmi ilaasortat Jordanimi muslimit partiiannut arlaatigut atassuteqarnertik assigiissutigaat. Sapaatip akunnera kingulleq Jordanimiut eqqartuussisuunerat aalajangerpoq Muuamaamik titartaasoq, Kurt Vestergård, Danskillu aviisiini aaqqissuisut qulit, Muuamaamik titartakkanik februaarip qaammataani naqititseqqittut unnerluutiginiarlugu.