Jonathan Motzfeldt: Tulluusimaarusimatussaqarpugut
- Pingaartorujussuupput assigiinngitsorpassuit tikissimasagut, marluk taarusuppakka: Kalaallit inuiattut akuerineqarnissarput ukiorpassuarni sorsuutigisarptu maanna akuerineqartussanngorpoq. Oqaatsigut aamma akuerineqassapput, Jonathan Motzfeldt tulluusimaaqisoq oqarpoq.
Aamma aningaasarsiornikkut nunatta pisuussutaanit – aatsitassanit uulianillu – isertitassat nunatsinnut nakkartalertussatut akuersissutigineqarput saniatigullu nunat allanut tunngasut niuernikkut aamma illersornissakkut sillimaniarnikkullu Danmarkip Kalaallit Nunaatalu isumaqatigiissutaannik allanngortitsisoqassaaq.
- Danmarki kisimi pisussaaffilissanngilaq, Kalallit Nunaalli aamma pisussaaffilerneqassaaq, Jonathan Motzfeldt oqarpoq.
Aamma Namminersorneq pillugu isumalioqatigiissitap suliakkissut naammassilluarsimagaa oqarluni.
- Isumaqarpunga amerlanerpaarpaatigut naammassisimallugu. Ullumi eqqaanngitsuunngilarput 1979-imi namminersornerulernissamik eqqussinissami suleqataasimasugut aporfigut ullumikkut annertunerusut qaangiuttutut ipput tamarmik, nangippoq.
- Kalaallit Nunaat nammineerluni Danmarkimik suleqateqarluni aaqqissuussamik siunissami sulinissaa kinguaassatta kinguaattalu aaqqissuukkunikku isumaqarpunga naalagaaffiup Danmarkip angisuunngikkarluni silarsuami inissisimanera iluaqutigalugu kusanartumik suleqatigiissinnaasut, Jonathan Motzfeldt oqarpoq.
Ulloq una apriilip ulluisa 17-iat oqaluttuarisaanermut annertuumik sunniuteqassaaq.
Kalaallit Nunaata aningaasarsiornikkut killiffia eqqaassagaanni isumalluarnartumik maanna inissisimanermini aamma Danmarkip naalagaaffianik isumalluuteqarnani imminut annertuumik pilersornerujartornissamut alloriarnerusoq Namminersorneq pillugu isumalioqatigiit siulittaasuat isumaqarpoq.
- Isumaqatigiinniarnerit erloqinartut qaangerpagut. Paaseqatigiilluta tuitsigut pattalaarluta ullumi qimappugut. Aamma iluarsisassaqaraangat taamatut naapittassaasut, aaqqissuussinerit kusananngitsut atornagit, Jonathan Motzfeldt nassuiaavoq.
Suliap Naalakkersuisut siulittaasuannut Hans Enoksen-imut Ministeriunermullu Anders Fogh Rasmussenimut tunniunneqarnissaa maajip aallartinnerani pisinnaassasoq, Jonathan Motzfeldtip ilimagaa. Tamatuma kingorna Nuummi Katuami juunip qeqqata missaani nalliuttorsiornerpalaartumik malunnartinniarneqassaaq.