Jonathan Motzfeldt: Tatigeqatigiinnermut akornutaavoq
Timmisartoq B-52- Pituffiup eqqaani nakkarmat qaartartut sisamaat nassaarineqanngisaannarsimasoq BBC-mi saqqummiunneqaqqammerpoq, paasissutissaq taanna tusarlugu isumaalunnartuusoq Inatsisartut Nunanut Allanut Sillimaniarnermullu ataatsimiititaliaanni siulittaasuugallartoq Jonathan Motzfeldt isumaqarpoq.
Allattoq Louise M. Kleemann
novembarip 13-at 2008 07:38
- Taama akuersaarneqarsinnaanngitsumik iliorfigisaaneq USA-p nunattalu akornanni suleqatigiinnerup tatigeqatigiinnerullu ineriartotinnissaanut akornutaavoq. Nalunngilaput taamanikkut sorsunneq nillertoq ingerlanneqartoq, imaappoq kangiatalu kitaatalu akornanni akerleriinnerujussuaqartoq, kisianni taamaakkaluarpalluunniit inuit inuunerannik, peqqinnerannik, allatigulluunniit inuup inuuneranik akeqarsinnaasumik isertuussisoqassanngilaq, Jonathan Motzfeldt taama oqarpoq.
Taanna aamma oqarpoq Danmarkip sukumiinerusumik nassuiaateqarnissaa naatsorsuutigineqartariaqartoq.
