Jonathan Motzfeldt peqqissiartorpoq - anersaartuuteqarallassallunili
- Inatsisartut siulittaasuat Jonathan Motzfeldt suli peqqissiartorpoq, nakorsat Reykjavik-ip napparsimmavissuaneersut taama oqarput.
Puallunnini pissutigalugu Jonathan Motzfeldt aammini toqunartortalimmik akoqalersimavoq, sulilu anersaartuuteqarallarpoq, aavalu suli salinneqarluni.
- Isumalluarpugulli. Jonathan Motzfeldt pitsanngoriartorpoq, ullullu marluk ingerlanerini itertissinnaassagipput ilimagaarput, Reykjavik-ip napparsimmavissuani nakorsaq radioaviisimut oqarpoq.
Jonathan Motzfeldt pingasunngormat Qaqortumiitsilluni perululerpoq. Nuummut Dronning Ingridip napparsimmavissuanut nuunneqariarluni sisamanngormat Reykjavik-ip napparsimmavissualiaanneqarpoq, massakkulli pitsanngoriartortoq nakorsanit oqaatigineqarluni.